今年最後一次去廸士尼@2009.09.04

由於廸士尼年票要到期，已經玩咗兩年加上恩祈開始上學，因此暫時不再續期，待廸士尼再擴建至玩過，恩祈都好明白，話等佢裝修完至嚟。

因此要玩晒所有嘢，恩祈已經安排好話要玩：Pooh Pooh、4D、小小世界、Golden Mickey、史廸仔，連佢最驚玩的巴斯光年都唔放過。今日天氣酷熱，樂園內得好少遊客，港人更少，係完全唔駛排隊個隻，雖然平時嚟都唔多人，但真係未試過o甘少。

姐姐派啲Ariel貼紙襯晒恩祈條Ariel裙仔。

天時暑熱都係玩水至爽！

廸士尼@史廸仔好玩夏日 2009.07.02

恩祈成個月冇去廸士尼，日日都嘈住要去玩。

呢度唔係沙巴，係大嶼山欣澳，原來香港的天空都好靚，看得人心曠神怡！

一入場就上演"史廸仔反轉大街騷"，有高飛、超能先生、史廸仔、小魚仙同燈神，與觀眾一齊跳舞，恩祈又無膽加入一齊跳只係齋睇。

"史廸仔怪相齊齊拍"有7個立體拍照熱點，恩祈影咗5個。

今日雖然好大太陽，但居然好大風而又冇乜人排隊玩game,真好運。

同史廸仔滑浪係小朋友的夢想！

齊齊著草裙跳舞

睇完睇咗幾十次的Golden Mickey後又趕番東涌去360餐廳，舅父又嚟請食飯啦！

去廸士尼探公主+整相機

2009.06.02    今日去咗廸士尼，恩祈過咗三歲都未有被人check可能佢個樣仲baby face啦！佢仲堅持帶條公主裙去著，在睡公主城堡前扮公主留影。又去探吓啲公主。

大Belle同細Belle

唔鍾意白雪公主抱喎！

去廸士尼都係例牌行程：睇4D、騎木馬同睇Golden Mickey show

睇完Golden Mickey一點幾啦，恩祈仲話要去小小世界，而家佢好有主意，不過我話約咗daddy要出朗豪坊整相機呀。

先去金寶越南河粉食海南雞飯餐同生熟牛肉河，果然名不虛傳好食呀！

兩個大食王唔多夠，行去Mos Burger叫咗個cheese burger set.第一次食都o.k.當然好味過食得太多的麥記，但我都係最懐念以前的哈廸斯。

上Nikon check部相機，個職員一開鏡頭嘩一聲彈開，佢話居然成個鏡頭都發晒mo(霉)，我話有乜出奇我日日狂影細路最緊要方便好粗用，就算用防潮箱拎出拎入啲空氣濕度唔同都冇用，而且用咗兩年幾除咗左上角有mo之外用得o甘多又成日跌都影得好靚算襟用啦......我叫佢搵師傅抹吓機，抹乾凈成支鏡頭要$550，同買支新嘅差唔多，o甘我叫佢凈係抹走個點顯眼的部份，只係$150就搞掂又影得番靚相啦。

等抹機期間，上咗12/F的CD warehouse.見到好多我心愛的陳年碟仲好平，不過老公叫我唔好買佢話出面仲平，但問題係我邊有時間機會去搵呀，雖然買咗都要等恩祈番學至得閒睇，但我真係忍唔住要重拾舊愛呀~~1)令人心碎的大師級作品---紅白藍三部曲之"藍"，佢嘅配樂極之出色要買dvd(都只係$55).2)睇十次喊十次講述秋田忠犬真狗真事的"八千公物語" 3)感人肺腑盪氣迴腸孫藝珍學生look純情到痺的愛情片"假如愛有天意"4)極為暴力經典核突場面劇情獨特發人心省的"原罪犯"..........我啲品味係咪好特別同廣泛呢，就知道我個人幾憂怨、幾感性、幾浪漫又幾變態！