我哋昨晚由泰國安全返港啦！泰國以前帶團去過成五十次，上次2008年同婆婆恩祈去都係跟團，今次至係第一次自由行，真係好玩好多呀！去之前恩祈開始流鼻水而我喉嚨敏感咳都差唔多成個月，但一離開香港居然都好番晒，恩祈至可以食雪糕我就可以食辣嘢呀。布吉島日日陽光普照，恩祈同daddy日日狂游水同食嘢，開心到痺^^ 曼谷食同買都好抵，好正呀！因為有紅衫軍事件成個泰國都冇乜香港人，尤其布吉周圍都只有鬼佬感覺好relax.......而且我哋好幸運遇到的都係好人好事(連聲名狼藉嘅的士司機同要講價好麻煩嘅賣嘢啲人都碰啱係老實人)，個個見到恩祈都好友善同鍾意佢(包括好多bb呀小朋友都主動同佢玩)，食嘢又啱食又平又方便，風景靚就更加唔駛講啦，感覺上仲好玩過沙巴呢，連恩祈都話 I love Phuket! I love Thailand!
開始登機啦，Air Asia勁準時，而且delay多過兩個鐘都有coupon送，上次Penang番嚟delay2個鐘就送咗每位200馬幣。
Daddy係第一次坐Air Asia.經呢位資深飛機清潔督導主管的全面檢查下，話呢架絕對係新機，而且好乾淨，印象良好。兩個多小時到達曼谷機場，朶朶白雲下就係Bangkok.
過關要影相，個關員叫恩祈望吓自己張相，原來上次去泰國影啲相都show埋出嚟，個時恩祈得兩歲半個樣好得意。過咗關先唱錢，機場只有1對4.01.(而布吉最高都只有4.08),跟住落樓下level 1 機場員工餐廳食嘢，啲嘢食平到喊，牛丸粉之類25銖，炒粉飯類都係三幾十銖，仲要係唔太細碗個隻，凍飲15銖樽裝水10銖.....食一餐飽晒又地道嘅泰餐只係花一百零銖(即係三十蚊！)
食完上番去level 4 check in 搭內陸機去布吉，由於已做網上check-in 只需於web check-in counter 麻煩地勤幫手print 張boarding pass就行得。
上咗機用自備的children kit比恩祈玩消磨時間，一個鐘鬆啲就到咗布吉島。
六點多啲到咗布吉，睇到夕陽餘暉.......係機場先買當地sim card Happy card(300銖連增值)，用004來打番香港只係4銖1分鐘。跟住出去機場轉右就見到meter taxi counter.其實都要問價但均真好多，我話去At Panta Resort佢哋開價300銖我冇還價就上車(我見隔離個鬼佬好氣憤一定要用meter但counter要收佢100銖服務費咪仲煩，已經平咗價錢又合理出嚟玩就算啦)，我見個的士司機個樣幾老實仲叫佢聽日在酒店門口等，送我哋去Laguna(只係5-10分鐘車程).由於佢由機場特登入去接我哋收250銖都好合理呀。(在酒店叫車就超貴而且任佢劏)
由機場去At Panta Resort只係20分鐘，差唔多七點就到咗但天已全黑。去到check-in 我哋飲杯冰凍好味 wellcome drinks先.......揀呢間酒店係因為佢好近Laguna而喺Zuji 度book五百幾蚊晚(而家旺季laguna最平要千五蚊晚以上)當時book仲有HSBC優惠平多$250即係約三百蚊好抵呀！
我哋住呢間Resort Deluxe Room係泰式別墅設計(第二朝從窗口望出去仲有個湖境)好特別，啲嘢係舊舊哋但翻新過都o.k.張床超大又係恩祈開心跳彈床時間。
我哋一早係香港已預備定杯麵同通粉做晚餐(因為之前做research酒店只有一間餐廳好難食又貴)，仲有酒店送的生果盆夠晒啦。
食完嘢沖埋涼仲有麵包超人卡通片睇呀(香港好似未睇過)，跟住早啲瞓，因為第二朝一早就要去靚到暈的Laguna Area啦。
沒有留言:
張貼留言