生日去海洋公園

2011.03.27    有細路的大人在假日生日，節目實係海洋公園啦！她快樂等於我快樂嘛！

入口完全唔同晒好有新鮮感。

新開的"海洋奇觀"，個所謂touch pool只有一隻海星同一條海參俾人摸(唔駛咁孤寒呀，個個都摸同一隻仲快死啦！)，同上年去澳洲有咁多任摸相差好遠好遠，唯一特別係呢粒海星呈半軟狀態，比以前摸的"硬骨骨"感覺比較有趣得多。

巨型魚缸似足迷你版沖繩美之海，壯觀情度當然差得多，但未見過都會感覺好好睇。多數人都話呢度新不如舊(海洋館)，我覺得各有特色，對小朋友來說呢度親近啲好啲，又可從高同低角度觀察魚類，都幾好呀！

夢幻水都人工湖：有小小Disney Sea的美人魚礁湖feel.

探大熊貓但瞓晒覺。

剛好遇上小熊貓feeding time.

人扮小熊貓

恩祈對金魚館最感興趣，可能屋企有缸金魚啦。

在大熊貓餐廳開餐，燒味飯好食過以前在山上food court好多又大碟食唔晒，蝦餃就真真好食，好大粒包咗兩粒蝦，28蚊同茶樓差唔多咋，佢哋好飽我一個人食三粒真滿足。

專登試搭新的海洋列車上山，好快但頭暈暈，又搭番纜車落山。

開始下着微雨，就去埋威威劇場睇海獅表演，小朋友好鍾意睇，恩祈今次睇得好投入好盡興。

見佢咁鍾意，就排隊同大海獅合照，一百蚊一張相仲畫質麻麻，不過可以近距離接觸海獅喎，好巨型有啲怕怕，而且影出嚟有啲似假嘅，哈哈！

最後問番恩祈覺得海洋公園好唔好玩呀？佢答："好玩......不過唔係幾啱我咯！"
我明嘅，因為有雨冇得去裡面個兒童遊樂場，其實冇得去我唔知幾開心！