西田百貨改名為一田後，在29/5開始一連五日大減價，就在前日即係第一日我去咗掃貨，一心去買日本奶粉(森永$130,和光堂$118)，點知要買3箱先送東涌，加上supermarket收銀排咗勁長龍，都係咪搞啦！
落二樓百貨部都好多人，但收銀條龍短啲就周圍睇吓，不過我就唔敢睇童裝怕忍唔住，因為恩祈實在太多衫(五個櫃桶都裝唔晒肯定過百件，部份我買大部份人哋送或轉贈，加上身材偏瘦到依家2歲重可以著6-12個月的衫褲所以囤積更多)就集中睇玩具。
最正的一份玩具就係日本Tomy 的Disney螢光多功能畫板 ，原價$449.9，依家$99，真係好靚好玩但我估恩祈要3歲後至玩得，最衰好大塊我冇手攞，如果唔係我實買多幾塊要嚟送禮幾好睇呀！
Kitty切菜組合八折後$40，恩祈好鍾意玩由朝切到晚，由好似我唔識揸刀到切法純熟，用來訓練小肌肉的最佳工具。
我開始迷上了的蒙特梭利教學法之生活教育DVD每隻$99又係八折
好得意的士多啤梨shortcake vcd 又係八折，我同恩祈都鍾意睇
Hello Kitty涼鞋最後一對24cm我計過恩祈出年啱著(今年有3對著夠晒啦！)原價好似$130幾，依家$90咋，好cute又好舒服。
日本一衫兩褲睡衣個款雖然老土啲，但係質料很好，100碼最快都要出年著，原價$199現價$69
講到最抵買最想買又最好玩嘅就係呢個法國嘅發聲洋娃娃Lilou,恩祈恨有bb玩好耐但我一直未遇到心頭好，今次個Lilou真係勁過癮，會笑會錫人會dadada重會玩躲貓貓，五分鐘喊一次要飲奶奶，飲到咕咕聲一停就喊，飲飽會打飽嗝才可停，安靜就會睡覺重有呼吸聲，但一嘈又會喊，要安靜超過一分鐘才會熟睡，搖下佢隻左手又會醒同咭咭笑，我同老公都好鍾意抱佢玩，不過後來成日喊又勁似真bb喊聲好煩，恩祈又成日大叫：媽咪，bb喊呀！........呢個Lilou公仔重附送佢做主角嘅dvd一張，原價$329，依家$99咋，勁抵玩呀！不過未計用電費。
好啦！廣告完畢！
同一般媽媽一樣，恩祈都係一邊餵奶一邊專心睇電視！
沒有留言:
張貼留言