我的體重

(2007.10.31)
我發覺在這二十年間，我的體重尤如恒生指數的圖表般大起大落：

20歲：110磅，有些過瘦，好想肥啲
23歲：120磅，因為跟了個識飲識食男友，最標準的體重
25歲： 125磅，冇再帶團告別頻撲生涯，體重稍增
27歲： 115磅，進軍刺激的航空飲食界，大壓力下又跌watt
32歲： 120磅，終於嫁得出又再次心廣體胖
33歲： 130磅，一日三餐大家樂，一個月肥咗10磅，個樣重老咗好多
36歲： 126磅，公司改用代糖，真的輕了幾磅
37歲： 120磅，有了小寶寶，沒嘔又渴睡，體重卻急劇下降
38歲： 142磅，臨生前的體重
38歲： 132磅，生產後翌日
38歲： 128磅，生產後兩周，因餵母乳迅速復元，肚腩突然變得平復

39歲： 122.....119....今日居然是117磅！長期缺乏睡眠的結果
註：身高5呎5吋，從無刻意增肥或減肥，一日三餐定時，從不愛零食和運動，相信肥瘦全取決於生活安定與否或壓力增加引致。

********************************************************************************

(2008.09.30)
我的體重(續篇)---- 繼續瘦

去年11月我出過篇blog"我的體重"，那時我的體重在半年左右慢慢下降咗差唔多十磅，有117磅，我以為已經係最低，但係之後再繼續瘦，好平均每個月瘦一磅，年頭問過醫生話只要冇糖尿就冇問題，但係我細個最瘦最排骨都有110磅，今年七月開始109磅我就有啲擔心，希望唔好再跌落去，點知繼續八月108九月107磅呀！再落去我咪會消失？由於我食慾不差，當然個胃係比未生女前細咗，但這兩個月重食多咗，身體又冇乜唔妥甚至連小病都欠奉，就周圍去問人意見：有朋友見我同個食量都幾驚人的囡囡都o甘瘦(恩祈呢半年只有長高都冇重過)就話可能係生蟲，我就即刻去買杜蟲藥同花塔糖食，食完都係冇蟲(其實我都希望有安心啲)！又有人擔心係腸有事，我就去做body check同醫生講我的情況，佢就話反而似甲狀腺有事又check多一項......報告出來完全正常醫生仲話啲數字好靚，叫我唔駛擔心又唔建議我照腸鏡，佢話好貴之餘仲係一個唔多好受的過程，建議我再睇多幾個月有冇再瘦至考慮入院大check.
我真係擔心自己的身體，我唔可以有事架！我有年邁母親又有年幼女兒，不過她倆尚算醒目，我最不放心的其實係我老公，屋企的事佢真係完全唔知，佢係最需要我照顧架。
因此我哋兩母女現在重大的任務係：積極增肥中！

暫時目標：媽咪107→115磅  囡囡24→28磅！希望能儘快達成啦。

後記：結果最後我的體重跌至最低105磅！但半年後慢慢爬升，恩祈入學後開始回復至正常115磅左右)