"好衰架，好麻煩！"

(2008.12.03)
每次手快幫恩祈做咗佢想做嘅事，佢會話我："媽咪曳曳！"最近佢仲講："(大聲)媽咪曳曳！(細聲)媽咪好衰架、好麻煩"。又或者叫佢做嘢唔想做："唔做呀！恩祈好麻煩！"
初時我有喝止佢，後來我冇理佢，等一陣至同佢講話人衰係唔好嘅，冇人鍾意之類，佢都知唔好就好少講同好細聲，不過我冇怪佢，因為......
由恩祈初生至兩歲前，佢晚晚都又喊又嘈，好多時係每1-2個鐘就會call我，冇一晚唔係，我知道佢有病，係"瞓得唔好病"，病徵係易醒難瞓、冇優質深睡同好多夢，其實聽講同我細個一樣，係冇得醫。對於我呢個晚晚被迫得半瘋的人，就每晚都話佢：妳真係好衰架，好麻煩！我個人就算幾嬲只要鬧完人就冇事(呢點我老公同阿媽最清楚)，否則我一早已經掉咗呢個bb落街啦。
就係o甘我又點會怪佢呢？係我唔以身作則，仲要諸多解釋。我仲好慶幸佢一路都冇學我，到而家至講，而且我唔係話佢"好麻煩"而係"麻X煩"......
昨晚佢又小魔怪上身啦，個個鐘都喊，晨早五點幾仲一頭又撞落我左門牙(右門牙一早撞鬆咗同壞咗變黑)又要去廁所，我今次冇鬧佢但忍唔住大力掉佢落床，我真係好衰！
今次我寫出囡囡的不是同自己的缺點真係要好大嘅勇氣，不過我哋都唔係完人，能夠知道自己唔啱肯寫出來跟住就要盡力改善啦！

我唔係變態專登影人喊個樣，佢每次午睡都要搞一輪至肯瞓，昨午又搞喊收場，我話：妳喊得幾好睇最好影張相！佢一聽到就即刻喊住都要我影，影完仲要自己睇番就瞓啦zzz恩祈笑嘅相見得多，喊見過未？