妙語如珠

(2009.01.11)
恩祈最近妙語如珠，最經典嘅有：
攞住粒糖自言自語話 :" 糖係拎嚟睇唔係拎嚟食架！"
(雖然我係同佢講小朋友唔好食糖，但呢句話係邊度學嘅呢？)
有日我見佢有眼屎我話用毛巾幫佢抹咗佢......
佢問："邊個疴架？"
 我點知呀！
仲有:"我係阿Belle,爸爸係野獸......媽咪我做阿Belle得唔得呀？"
我實話："唔得！如果爸爸係野獸，我就要係阿Belle" (美女與野獸嘛！)
跟住佢就會打我一下好大聲講："我要做阿Belle呀！媽咪你做灰姑娘啦！"
平時講嘢會講好多啱聽說話，例如：
"我大個女唔駛抱架自己瞓架！" 但係就壓在我身上攬住瞓。
"我叻叻女唔駛剪架自己咬架！" 轉頭咪又將大塊啲嘅肉吐出嚟。
仲有"媽咪話玩完啲玩具要執番好架！"........
都係得個講字多！不過最甜最真都係呢句："我真係好鍾意媽咪呀！"