重投社會工作

番咗工差唔多一個月，好開心好習慣呀。其實一周只番三日，所以只係番咗十日工。
在神的眷顧下找到一份頗理想的兼職，只番早上九點至下午一點(但係好多時十二點幾就走得)，地點又在機場只需十至十五分鐘車程，時薪更有成四十元算好唔錯。工作方面，早上做啲paper work.有貨到開箱點吓(香水化粧品同朱古力之類)啱唔啱數，有冇爛嗰啲，然後又封箱，就係咁簡單，係有時啲香水好重冇男仔幫時就辛苦啲。本來part time一周要番五日，不過我話暫時三日就得啦，而且下月初又要去日本旅行，個Bond Manager好nice話可以就番我，最重要係照顧好家庭先，好感動啊！呢啲上司先至係人嚟嘛。番咗工之後我個人積極咗同內心有踏實的感覺，而恩祈亦更獨立了，會做好功課比我睇等我放心。

我老公起初唔支持我番工，除咗小朋友年紀小之外，當然係錫我怕我辛苦啦，佢怕我唔夠瞓會發顛(其實返嚟仲有得瞓晏覺)，而我媽媽就好支持，佢話人要做嘢至得，仲話有人請佢佢都想工作，恩祈都好了解，我同佢講番工我哋就可以傾電話好開心(平時日對夜對冇機會傾)，佢居然仲諗到話等我番嚟叫我坐低休息吓再比杯茶我飲，又幫我收埋手袋，幾乖。恩祈的自理能力同心理質素都好，我唔太擔心，反而比個責任佢睇住婆婆，佢話一定會。

其實我想返工因為想證明自己仲有價值同能力，以及唔好同社會脫節。以前番工總想快啲退休，就努力賺錢儲錢同投資增值，總算願望達成卻又似有些缺失。
現在有工作、有家庭，又毋損親子時間，真係感覺幾完美。