第一站先去蚊芝屋企玩吓，蚊芝係我2005年去埃及的團友，當時佢未嫁真係青春玉女，成個大眼阿Sa,成日笑但又好斯文，我最鍾意呢啲乖女仔，經我主動"追求"下終於由團友變成blog友再成為朋友啦！佢最鍾意旅行同食(啱key！)，仲有整嘢食，今次佢整咗南瓜綠茶包包比我哋，真係好健康又美味，仲煮吞拿魚意粉食到恩祈好掛住佢。
到咗中環同三個幾月冇見嘅奕彤妹妹追跑熱吓身先。
全部都係朱古力呀，睇到人心花怒放。我覺得食落都唔太漏，正嘢即係正嘢！不過食得太多當然都滯啦，佢哋就冇乜後勁，全靠我同恩祈一定回晒本呀！
掛住食我都冇睇係啲乜，總之係o甘食完又食，想睇詳盡介紹就睇我引用的"蚊芝blog"佢寫得好過我好多......但我記得下圖呢兩款我最鍾意食，左面好香滑右面好正，仲有最上面的四款朱古力果仁粒，食極唔厭！
幾乎全部我都試過，我好勁呀！
兩位小朋友埋首畫畫，酒店一早安排晒畫筆、畫紙和近門口攞嘢食的位置比我哋，真窩心！
上面張相影到我哋好似樣，希望遲啲可以扮姊妹出街(笑死人！)
好有Happy Easter的氣氛，都係用朱古力做架！
除咗buffet table任食外，仲有一set assorted sandwiches and scones.scones配的其中一款果醬是文華最聞名的rose jam.但係我一食好重香水味，好似食緊玫瑰花梘液or玫瑰香精，啲香味令我吃不消，另一款jam都好難食，我真係唔識貨呀！
我order的法國香草茶就幾好飲，但係人哋啲士多啤梨綠茶我仲鍾意，好香士多啤梨味。
兩位小朋友又對奕彤daddy部 I-phone 玩到著迷，最愛睇波兒首歌，恩祈叫媽咪買，媽咪話：我又買咗滙豐，唔駛買I-phone啦。
睇吓恩祈個嘴邊滿是朱古力，真係污糟得好幸褔呀！
有復活兔到場，恩祈好興奮地同佢拉拉手。之後我哋去到一個供應小童復活餐的雪糕櫃，我哋冇食個兒童餐但個哥哥都好好人話送杯比恩祈，恩祈就話要食"櫻花雪糕"，我沒好氣就話要strawberry Gelato.埋位後我叫恩祈同奕彤一齊食，我話要分享至好味架，佢真係肯，有邊個細路肯將至愛嘅雪糕分比人食？真係聽話......佢兩個分享雪糕個樣真係可愛極呀！妳一啖我一啖又一齊lam好似真係好食過獨自食呢！
奕彤好怕個小丑，其實恩祈都有啲怯成日躲在兔兔後面，個小丑問恩祈要乜嘢汽球，恩祈話要：玫瑰花。真係有主見啦。
我全場都見唔到有細路，只係見到連我哋有3個bb,佢個復活節兒童餐應該係食白果，就連復活兔都好悶，好彩有恩祈一食完就同佢玩，仲驚佢悶係佢面前勁跳熱舞一番。
食完飽到滯去中環行吓街，我哋在格外清靜的中環街頭留下快樂的一刻。
沒有留言:
張貼留言