2010.05.08 今日係我同老公結婚十周年，我哋共同度過咗開心幸福的十年，仲生咗個可愛小寶寶，為咗紀念呢一日，我哋三個去咗尖沙咀影婚紗全家福呢。影之前就book咗半島酒店的瑞士餐廳Chesa先慶祝一番。
歐洲小木屋的佈置配上昏黃燈光好有溫馨的home feel~~一坐下先來一籃頂級好味的麵包。
個menu啲法文固然唔識睇，連英文除咗豬雞魚之名稱外啲煮法都唔識睇喎！個經理好有耐性詳細介紹下，太複雜結果我問咗兩次都唔係幾明，我就講咗句: "你哋啲嘢實好食啦！"佢答:"咁係嘅..."好啦，頭盤就一個唔知咩嘢魚湯同唔知咩嘢鱒魚啦，真係唔知咩嘢但好好飲同好正呀。
主菜唔知咩嘢鱈魚同乜乜豬柳，總之又好好食。
到咗重要時刻，結婚周年朱古力小屋出場啦。
其他甜品都到齊，唔知乜嘢芒果同士多啤梨乜嘢，我一試，嘩！兩樣都好酸呀頂唔順，老公卻話酸酸甜甜幾好味.....咁俾你食晒佢哋啦。
間朱古力小屋內裡係包住好滑嘅cream、雪糕同餅碎(勁好食,成$135一間)，因此恩祈玩完吹蠟燭就要快啲拆屋啦。
餐後杯Mocha同咖啡都好有水準，仲有碟甜點送，但係食埋間朱古力小屋後真係飽到上心口，我同恩祈只係試咗三角形朱古力，老公都食唔落，其他想試一小口我就放低，因為真係想嘔啦，oh!浪費食物，罪大惡極。
冇嘢玩牙簽盒都玩，食到尾聲，恩祈終於講咗呢句：好悶呀！小孩子總是討厭浪漫的地方，我同佢話等你讀到小學就唔駛同你嚟，我哋二人世界呀。
老公話都係鍾意食Felix或者露台餐廳buffet多啲.......我就覺得Chesa小巧得來好warm我都好鍾意呀。
下午就去咗影全家福，我揀咗簡單式樣帶點古典味的婚紗同類似新式旗袍的紅色晚裝，老公都有兩款西裝，我哋好似fit過十年前少少(我結婚時肥肥哋)。而恩祈最興奮，一套花女裙同韓國服，仲第一次化粧呢！
影完相都只係五點幾，恩祈好攰我哋亦唔餓，搭車番東涌至去大食代的日本餐廳食飯，慶祝結束，Happy 10th Anniversary!
沒有留言:
張貼留言