Yankie x Blythe

2009.11.01 (Sun)    今日係我哋去開的Calvary Church二十周年，因此去咗尖沙咀的總堂，我哋Children's Church 班小朋友都有上台表演，不過冇恩祈份。

之後同恩祈去海港城睇B女Blythe的展覽。

恩祈最鍾意呢個婚紗Blythe.其實係著婚紗嘅佢都鍾意。

我最鍾意上面嗰B女，條裙好高貴。下面左邊Suki都扮過造型的就好可愛。

場內有微型場景供拍友自備B女(要最細嗰size啲B女至啱)拍攝，啲人當自己個B女係寶，咪話想影佢哋，就算望吓都唔比即刻收埋，真小家呀！恩祈話都要扮B女影相，但佢實在太巨型，遮晒啲景之餘仲要影到穿崩至影到佢。

有個姨姨居然又大方到叫個女借個細B女比恩祈影相喎！

B女雖然可愛，不過我都係覺得我個真女可愛得多.......如果平啲我就買個比恩祈玩啦，我最多肯比$500蚊咋，我估都買到隻腳嘅。

有間運動用品舖有等身高嘅姚明，同細小的恩祈相映成趣，姚明對鞋巨型到嚇親我呢。