食$1雞賀41生日

2009.03.27    今日生日成日都"唔老黎"，落雨濕濕恩祈又喊咗成晚.......sad!
今晚訂咗枱，去旺角"上樓"食$1雞同上海菜。

第一隻一蚊雞，恩祈好鍾意食食極唔夠，好在隻花雕雞酒味唔濃

賽螃蟹好滑，隻雞好快清曬又叫第二隻

阿媽話生日要食碗長壽麵，碟雪菜帶子蝦仁炒飯只係食咗少少(食咗2隻雞太飽)，打包返屋企。

爸爸同我哋三母女影相，都唔記得咗同老公影，不過生日最緊要同阿媽慶祝，係佢辛辛苦苦生我出嚟(雖然佢話一啲都唔辛苦)，媽媽話覺得身體差好多，唔知可唔可以陪我再過多一兩年生日，我聽到想喊出來。

我最鍾意食嘅甜品就係高力豆沙啦，要同恩祈爭食。用Compass咭埋單又送多碟桂花紅豆糕真係好食。食o甘多嘢埋單只係$170！我哋已經係好豪啦，隔離兩個哥哥食咗2隻雞同加送嘅桂花糕，即係$2 就埋單。

番到屋企，恩祈仲好飽，就扮個爸爸姿勢攤係度(老公就係o甘瞓梳化架！)

差啲唔記得，我今年嘅願望係恩祈唔好再發惡夢成日嘈醒我，等我唔駛發顛。我媽咪就健康長命一百二十歲！