送星加坡老友機

2009.12.16    恩祈一放學校服都未換就要趕去機場送機，之前經過東薈城影咗啲聖誕佈置相。

呢位就係我在星加坡居住識咗差唔多成20年的老友Angela.佢當年靚妹仔仲讀緊大學時跟我去韓國濟洲島五天團時認識的(當年同啲團友好易熟好friend的)，我睇住佢由好細路女到拍拖做嘢結婚仲生埋仔，真係不禁要講句：時光飛逝得真快，但友誼卻長存不滅！

Angela個大仔Sean當年剛出世我哋都有飛去星加坡探佢，肥嘟嘟好得意，而家7歲啦好識social仲拖住恩祈隻手仔呀！細仔Issac好怕醜又有性格都無眼睇佢兩個。

佢大仔似mami細仔似daddy.因此我都唔敢生，如果第二個似daddy.......

佢老公Eric當年英俊得成個Leon但係而家做咗全職湊仔公仲要兩個都係仔，真係殘到走晒樣，哈哈！可惜可惜......不過係會有回報的，Eric.

係呀，仲有Angela阿姨 Pearl我都成超過二十年冇見啦，佢以前係星加坡康泰的導遊，我做領隊時同佢拍過團架，佢以勁甜美聲線著名的。我同佢講我出年都book咗去星加坡玩到時再聯絡。

送完機後恩祈雖然好攰都急不及待攞咗Angela送比佢的兩本書出嚟睇，佢好鍾意尤其係童話故事個部份.......Angela多謝晒妳仲有啲肉骨茶同星加坡袋，妳好有心又啱晒我哋。

今日學校仲派咗一盆石竹花苗話搞綠化校園計劃"一人一花"種植活動，回家種植一個月同做花盆設計.......就睇吓一個月後盆花會變成點(恩祈話有同學已經整爛咗)。