荃灣碌冧食團年飯

2010.02.08    今晚到荃灣同伯伯姑姐食團年飯，之前在愉景新城的桃花陣影咗幾張相。

今次我一反傳統唔食中菜食越南菜的碌冧，反正爺爺嫲嫲都已經唔係度又冇老人家，而且呢度5-7點時段任飲任食只係$75咋。

伯娘見上次送的公主有幾個比恩祈玩到爛咗，今次又買咗新的一set比佢啦，仲送咗套新年靚衫(係年年送)同一堆頭夾..........

恩祈同公主又有排玩同傾計

呢度啲食物質素有啲參差，我覺得啲粉包、牛肉河、炒飯、雞、秋刀魚、蝦卷、蔗蝦都好好食，不過同一樣嘢又未必次次都好食，好似粉包第一次嚟好硬唔好食第二次好熱好軟又好食，不過$75算啦咁多嘢揀都實有好食，但係飲品就只有可樂同咖啡好正其他冰同湯好稀。

睇吓恩祈一開始就食咗炒飯同成碗河粉，肚腩脹卜卜！餐廳招呼好好尤其啲經理好熱心有禮貌，order又嚟得快六點已食飽晒咯。仲有一提呢度嘅環境都好靜裝修亦好優雅，呢晚東文伯伯生日我哋仲切蛋糕(自備)搞到好糟唔係幾好意思。

食完仲好早又去行商場，daddy在Ice Fire買咗黑、白恤衫各一件，我就買咗個花布手袋。而恩祈在OshKosh揾到件好靚嘅羊毛大衣，原價成千蚊而家折扣左減右減後只係三百零蚊，得番一件，抵呀！