上學期散學日得勤到獎

2010.01.27
今日係學校的散學日，即係上學期結束做個總結，恩祈放學有份獎品帶番屋企，原來佢得到個"勤到獎"，據佢所講A同B班都只有佢一個攞到，老師同佢話要冇遲到過同冇病過至有，咁真係幾難攞，唔遲到都唔難但係K1冇病過真係好難，校長問佢點可以咁健康，佢答有食菜咯。佢仲話當領獎時啲同學都有為佢拍掌......不過下學期佢一定攞唔到，因為至少有2個trip要請假呀！我係嗰種"讀萬本書不如行萬哩路"的支持者，而且而家我暫時仲可以自己教呀。哈哈！

份禮物係本單行簿同水筆，好啱用呀！We like it! 又派番晒啲上學期功課比我哋

仲有啲在堂上做的手工同工作紙，好得意喎！

******************************************************************

我比歌莉亞感染下學人番煲日劇"交響情人夢"，真係好好睇好好笑，除咗再次激起想去布拉格的心之外，又突然想掂番個十幾年都冇乜點掂過的琴，嘩！除咗布拉姆斯首Waltz仲記得啲之外，真係要從初級書再練過，因為以前我都係屬死記唔多睇譜的人，所以更加唔記得點睇，我想教吓恩祈篤吓睇吓佢有冇興趣，點知佢一上嚟就話要彈"天黑黑"(唔係孫燕姿嗰隻，係課本"小豬愛睡覺"中的一首兒歌)，都唔專心聽我教，好有耐性好辛苦至教到佢一隻手指彈一個琴鍵，我估都要過多半年至再試過，希望佢會愛上彈琴啦，不過佢肯一粒一粒音彈都好過以前係成隻手拍落去啦。