搭咗兩個鐘頭車來到室蘭地球岬，好失望呀！因為超級大霧！呢度的景色非常獨特，如果天清氣朗，成個太平洋的美麗弧型地平線都望到。就算陰天都好靚。
但現在是在一片迷霧中，差啲伸手都不見五指，一啲嘢都睇唔到，只有靠看圖幻想，非常可惜！
凍凍哋，買罐北海道牛奶咖啡暖吓手，但恩祈的表情話好"辣"手。
跟住去"蟹御殿"海鮮市場午餐，市場內有著名的夕張蜜瓜同長腳蟹。
團餐風味石狩鍋中的三文魚同蟹腳都好鮮甜。我order咗一隻新鮮海膽即開嚟食，細細隻都成1800yen.都係小樽的海膽好味又平好多。
其實在餐廳食飯時係對住浩瀚的太平洋美景，可惜天色陰暗，不過都好過今朝在地球岬大霧到乜都望唔到咁差。
下午出番札幌狸小路自由活動，導遊先帶我哋去一間土產店買土產，有折都買咗好大袋朱古力呀草餅嗰啲，恩祈成日提我買手信番去比啲同學仔，有冇搞錯咁細個都要買手信。
放低手信在土產店後，行前兩條街揾到Tokyu Hands唔係好大間，只係睇吓啲得意嘢，日本人愛整啲無厘頭多餘嘢。
行咗兩間百貨公司，見天色o.k.就行前去札幌地標：大通公園同電視塔影相，點知影唔夠五分鐘，就行雷落雨啦，好在時間啱啱好剛影完。
淨番小小時間，行埋地下街上番狸小路商店街，全部都係落雨落雪都唔駛怕。陰天咗三日而家先落雨都算好運。
今晚食Shabu Shabu放題，普普通通啦都食得好飽。
團友在街邊車仔檔買到導遊介紹有400億活性乳酸菌的益力多(香港的是100億日本國內200億)，送咗一支比恩祈妹妹試呀，THX!
沒有留言:
張貼留言