尋晚咁攰又咁夜瞓，今朝七點多又要起身去搵食，睇吓恩祈仲咁精神就明白到旅行同出嚟玩的魔力。酒店行前幾分鐘就有個monorail車站，車仔細細好cute(唔記得影吓車身><)搭咗三個站(由Medan Tuanku去Bukit Bintang)去搵最正的"新峰肉骨茶"，行錯路搵咗成半個鐘至到。
坐低就啦啦聲叫肉骨茶同配料仲有凍凍的羅漢果水。
吉隆坡的肉骨茶至正宗至入味，唔係為咗呢樣嘢，我都唔會咁麻煩特登入K.L.住一晚就走(剩係來回坐的士都成四百蚊呀！)個個都讚very good！恩祈一早就撈咗成碗飯食晒，我最like油條浸肉骨茶，一個咁嘅早餐就食咗RM.42但絕對要食。
約咗尋晚個司機今日十點車出機場，就由新峰搭的士番酒店，原來睇錶收費都只係五蚊，搭monorail兩個大人都要Rm.3.6啦，等朝早仲搵到死死吓，當體驗吓坐當地交通工具啦。我哋住的是超平酒店Tune Hotel.只係港紙一百蚊，我哋間房唔嘈(有買冷氣嘆)又乾淨，仲有好平的便利店在樓下好o.k.。
臨離開前叫個好人司機去停吓比我哋影吓Twin Towers國油雙子塔，有呢啲相至算嚟過吉隆坡(真老土！)，今日星期日完全冇車飛馳到機場都差唔多一個鐘，詎離市區好遠的一個機場！車廂中我望到收費表，原來半夜十二點後的士費要收多50%surcharge.個司機尋晚都冇問我要，怪唔得佢個樣好似有啲委屈啦
老公話佢可能怕我唔叫佢車出機場(係大生意喎)，嚟K.L.之前好怕比的士司機欺騙(亂開車資)，點知反而係我哋做咗老千咁。
搭1310pm飛機返香港，有啲時間同恩祈食個兒童餐先，麥記好食過佢好多。
佢又畫吓畫打發時間，好明顯係畫緊daddy 同mami推Yankie去搭飛機。
由於我哋只可每人手提一件行李上機，所以冇乜買嘢只買咗幾盒當地著名的Beryl's朱古力當手信加自己食....榴槤味朱古力最出名同貴啲，但只係得少少味麻麻哋啫，Tiramisu朱古力個面苦苦哋但我就覺得好好食。
好開心順利完成咗今次短短但難忘的四天旅程，尤其都無對呢度預期有咁好玩(去得太多熱帶地方諗住都係普通陽光海灘休閒吓)，仲有就係全部埋單駛費只係用咗HKD5000.係五千蚊包晒我哋食住買玩連機票呀，哈哈哈！自己都好佩服自己，浮羅交怡絕對係一個高消費(尤其旺季)的旅遊熱點呢！
不過真係要抖一抖啦，上網搶平機票平酒店同查旅遊資料都好傷神的........其實在香港都大把嘢玩，今年我會留港消費多啲。加上剛剛日本大地震令我冇晒旅遊意慾，我知我已好好彩，上年去完Bangkok就紅衫軍大單嘢，啱啱去完東京無耐又係咁............無乜特別都係留在香港最好，而且恩祈學嘢越來越多，或者下個冬天會考慮去韓國，同佢滑吓雪咁.....恩祈旅遊札記，暫時再見！
沒有留言:
張貼留言