在家做蒙氏練習

個幾月冇上montessori class,在家中照做蒙氏練習：倒水、夾棉球、掃地、抹枱......
多得Jasmine mami Becky 將她多年來親自為女兒做的教具贈與恩祈，她在星加坡係學晒Montessori 的 full course. 啲教具做得好好同keep得好整齊新淨，我會比心機教恩祈玩，到Jasmine再有弟妹我就會完璧歸趙。

上下圖都係自製的觸覺訓練：上面係四種唔同嘅粗、滑表面，要佢答smooth and rough.下圖唔同顏色同質地的布重可以玩matching.最好合上眼摸，不過恩祈合上眼都會睇到嘢嘅(即係偷睇)

一些學形狀和顏色的拼塊，恩祈卻鍾意將圓塊層層疊。

圖畫和英文配對依家只係玩下，要大啲至做得到。

Becky 姨姨重送咗大量Jasmine的圖書俾恩祈，其實佢一直都有送，這些只是部份，其中幾本仲係Becky親自做、繪畫再過膠成書，做得好精美好吸引恩祈睇，Becky妳真係好叻好有心思多謝妳。

又比咗兩本Montessori的書我睇，初時睇到密麻麻的英文細字都有啲驚唔識睇(我英文好水皮)，但係一睇裡面Becky有啲notes同註釋，加上睇過中文版都唔係好難理解，不過我估要等恩祈番學至有時間用心慢慢睇，好在主要都係3-6歲的學習階段。

這套野生動物小模型係伯伯送的，恩祈從而學到陸上同水上動物的分別，佢將水中生活的動物放在小蓋上當係水中，有次我將獅子、老虎同豹示範獵食斑馬同鹿，恩祈好心痛的叫：唔好食佢哋呀！我話唔得喎，佢哋係肉食動物，唔食肉會肚餓會死架！恩祈想咗一陣，就指住自己隻大脾話：好啦！o甘比佢哋食雞脾啦！顯出佢都有憐憫之心，我就即係攞隻獅子去咬佢大脾搞到佢呱呱叫又哈哈笑。