一早就離開酒店，daddy開始"專注"揸車，我就落足眼力負責睇地圖。
第一站Big C十分鐘就到，恩祈不停試玩。
我哋嚟的目的其實係食早餐。
食完又要玩......Big C係泰國的Super supermarket
下個目的地係查汶海灘Chaweng Beach.睇地圖好似幾易但有分叉路又轉錯咗，不過都好快入咗佢條單程路，隨意泊低架車揾啲travel agent想去找帕岸島(即係有fullmoon party個島)嘅tour，因為daddy話今次要騎大象(真老土)同又想出外島，有小朋友我又唔想去龜島咁遠，就想到近近哋帕岸島有safari+浮潛可滿足兩個要求，但原來冇agent搞呢隻團，咁又見呢兩日天色唔算好都決定明天唔出島改在酒店relax.....跟住就在Chaweng Beach行過圈離開，要趕住今日去埋Namuang Safari比daddy騎象。
蘇梅最著名的Chaweng Beach玩咗一陣沙
出大路沿4169公路好快就到Lamai呢一區(後日住的Banyan Tree亦在此區的山頭)，將車泊於巨型超市Tesco Lotus停車場後，就在旁邊食地道雞飯同豬腳飯，明明係50baht一碟佢問我哋邊度嚟就話要80baht,算啦唔好為30baht動氣，最緊要好食，個湯好多料好好味但係滾熱辣，一路食一路標汗。
跟住就去揾Namuang Safari應該20分鐘就到，點知比另一個有大象標誌牌的safari引導錯誤，係佢哋個山頭遊咗半個鐘至知去錯咗地方，搞到差唔多成兩點就到表演時間開始至到。呢個Namuang Safari收費同收tips亂嚟，我話2大1小睇animal show同1大1小騎象，佢唔知點計話2550baht.我話冇咁貴喎，佢又話收2100baht.我都冇時間再拗，臨走前佢居然細細聲問我可唔可以比tips佢，佢賣入場券咋比咩tips我扮聽唔到，不過啲泰國人又真係冇乜嘢唔比都笑笑口好nice.唔似香港會黑面美國會話你呀。
第一個係Elephant show入面啲遊客全部都係歐洲人，即係好好劏，係咁叫啲遊客騎上隻象玩收100baht tips.玩咗鬼咁耐都未開始表演，daddy好興奮恩祈就好驚因為條象鼻係咁掃嚟掃去，呢度啲象好靈活乜都肯做但又好瘦肯定食唔飽，(我都話人又好動物又好食唔飽嘅就聽話)。
跟住我叫老公都上去騎吓，因為冇乜地方咁虐待動物可以咁玩法。
就咁抱住恩祈影張相，又要屈多100baht!
Safari內表演雖然精釆，但有虐畜之嫌，令人心痛，不推介！
睇完Elephant show就去隔離睇Monkey show.
呢個show好搞笑恩祈睇得好開心！
有冇見過馬騮好似人咁依起棚牙笑？將馬騮化晒粧又好似人咁坐，我都覺得係虐畜
走晒光的馬騮小姐唔 like daddy.
再去睇第三個show---鱷魚表演。又係瘦到死的鱷魚。
睇完已好攰恩祈又話肚餓，我哋冇再去睇第四同第五個show(bird show and tiger show)
我哋仲要去騎大象，途經見到可憐兮兮的小老虎被綁住不能動彈。
開始時恩祈話唔騎，但上到去又笑笑口。
daddy做象伕呢！其實恩祈兩歲時都騎過冇問題，但唔知點解越大越怕大象。
大象先生話：喂！小姐妳未比貼士(香蕉)我喎！
沒有留言:
張貼留言