2012.02.18 酒店食完自助早餐後(住三晚要食成三日)就出發去今次最重要的目的地，陽智山滑雪場。這是很近首爾的一個滑雪場(當然要越遠越高山積雪的越好)，尤其由水源去就更快，不消半小時就到，先去租滑雪服，點知都好舊又爛拉鍊租唔落手，導遊話恩祈著住個套仲靚啦(初時聽說滑完雪會好汚糟，可能恩祈冇乜跌落地又好乾淨喎慳番萬五won)只租了副滑雪眼鏡，去到滑雪場租埋滑雪用具，又減價只係萬八won(小童)，我要睇住恩祈同埋影相，因此我係冇滑雪的亦都冇興趣。
開始拿着雪具步出室外，導遊只係帶住大家做咗幾吓熱身運動同講解幾句，就帶有上山滑雪証的團友搭吊車上山，只有我帶住恩祈試吓玩，佢可能玩過幾次溜冰又行得幾好，佢話易過溜冰呢！
由於滑雪要用好多體力，佢好快就話攰和脫下雪具，跟住去玩雪磚和冰滑梯都好開心。
然後去餐廳食lunch,個大蒸餃加拉麵套餐好似萬一won咋，又加多碗炒辣年糕，多到食唔晒(白飯同泡菜等配料仲免費任取)，又有wifi上網，坐咗個多兩個小時，我再叫埋杯Mocha 飲同提子雪糕比恩祈食，好舒服呀！
食飽又休息夠再穿上雪具去滑雪，恩祈今次活力充沛，滑得有少少似樣，冇人教自己亂嚟滑都算係咁咯！
玩咗成五個幾鐘後，出番市區都成黃昏六點至去到Four season Water Park & Spa.連沖涼只有個多小時當然唔夠玩，好在入面都好細，恩祈不停玩滑水梯勁過癮。
最後食埋人參燉雞，恩祈加咗成三次長壽麵呢，佢真係食得多過大人，仲好鍾意食韓國餐(尤其餃子、麵條個啲)。
呢條就係人參啦，咁細條最多係"一年參"啦。
沒有留言:
張貼留言