買咗套Here We Go 發聲書連 I-pen 教材

上星期商場有road show 介紹一套台灣出的發聲書叫Here we go.我對支 I-pen同佢送本廸士尼發聲書好有興趣，內容有一枝發聲筆(可用於其它發聲書),6本發聲書,6套VCD(共12張),6套CD(亦係12張),6本練習薄,6本單字本&1000字disney發聲書，要$2388我覺得都o.k.因為Disney 同Noddy啲教材成幾萬蚊套又成大櫃太多冇地方擺亦未必有恆心教，婆婆梗係拉住叫我唔好買(結果後來又係佢爭住比錢買)，我就上BK問吓其他媽咪意見，佢哋大多數都話太貴，建議我買NODDY$680(只有I-PEN同6本書)，搞到我心大心細，不過最後我研究過都係呢套Here we go教育方面最全面，而且有位BK 媽咪有一套99.9%新出售$1800,經我講價後只要$1700,我哋就擁有呢套英文教育用具啦。

原來唔係99.9%新，而係99.99%新至真，只係有一本書頭幾頁揭過，真係超值！個媽咪買咗冇時間教，放在屋企三個月至割愛......套教材原來係台灣幼稚園的教材，我跟程序先比恩祈聽cd,然後至睇vcd.再玩 I-book.習作簿我打算遲啲至比佢做，書仔就隨身帶等佢隨時鍾意就睇。vcd有唱歌仔、朗讀，另外教英文同講故事個鬼佬表情好生鬼好誇張，睇到恩祈好開心好好笑，而且講得簡短、清楚、慢、又重覆，好遷就小朋友的需要，我諗住一星期比佢睇兩次，重覆睇一個月，因為頭兩本書比較簡單，其他要慢慢來......佢第一日就學識cup同spoon啦！

不過講到我哋全家都最愛不釋手嘅就係本廸士尼一千字英檢圖典，又大本又厚印刷好靚，用I-pen一點除咗會有生字的英文同國語發音外(仲有要講吓幾本書的發音都好準，唔會怪怪哋)，點吓啲場景都有聲，好似bb喊聲、車聲、水聲、動物叫聲、食嘢聲之類，好有趣。

不過一定要家長陪伴睇至有用，小朋友冇互動會好易悶同冇耐性，而且佢太細個好多嘢都要解釋至明白，我哋用多咗好多時間陪佢讀，佢真係好開心同好多嘢問亦好多新想法。

恩祈最鍾意睇美女與野獸食嘢個頁，因為Belle同食嘢都係佢最愛......最怕係下面有巫婆個頁，佢話好驚個巫婆，係驚到震個隻，佢唔要睇我唯有用紙遮住個巫婆。

除咗英文同國語外，仲教埋顏色、形狀、數字、對比、星期月份等常識。

有時都比佢獨立自己玩吓，不過我哋擔心支筆，佢唔會掉但係支筆對佢係太重，有時見佢手攰放低支筆放得唔好就會跌落地下。