第一次溜冰@The Rink

2008.12.08    Jasmine最近去學溜冰這玩意，話見到好似恩祈o甘細都玩得，問過恩祈佢都話唔驚想試，今日就去Elements 的溜冰場The Rink試吓先。

租咗隻企鵝比恩祈扶住行，同daddy落場啦！可能剛開場加上同場只有一個人溜冰，所以啲冰面好滑佢好難控制對小腳，不過佢都好落力去學冇跌過。

恩祈好吃力玩咗一陣，我搵張小凳比佢坐吓休息吓，佢望住Jasmine揸住企鵝影相同daddy溜冰個樣笑得幾甜！

我又準備好落場啦！

今次明顯滑得定咗啲啦。

不過恩祈都係鍾意出出入入，因為佢著溜冰鞋行地面行得好叻，行出行入可安定佢行冰面不穩的心......我係偷偷哋入去影相同拍video咋，我哋都冇"嘟"八達通，走嘅時候個職員哥哥話下次唔好今次佢睇唔到，真係好人。

daddy成二十年冇溜冰原來都玩得幾叻我都唔知，不過我話當年啲男仔梗要識溜冰先可以拖女仔隻手教嘛！o甘Jasmine同Yankie要快啲自己學識咪比男仔摸手仔啦。

Jasmine用張凳仔推Yankie同Yankie's daddy玩得好開心，但係好就快比職員阻止啦。

玩咗成個鐘，著溜冰鞋又唔舒服就唔玩啦！恩祈對溜冰鞋係全場最細SIZE的一對，好新好似冇人著過，佢個樣好似話點解對鞋有把刀嘅？

Jasmine意猶未盡，恩祈就坐sofa食餅同飲支益力多等佢。

Elements的聖誕樹同聖誕佈置

然後上咗二樓的無敵大海景book store睇書，不過啲兒童圖書大部份都包住嘅，又整甘多兒童seat 位又唔比睇唔知做乜呢？

去完夏麵館食lunch後daddy要趕返機場番工，我就同恩祈上平台公園玩。

今日好好天氣室外好和暖，加上個場又幾乎比我哋包晒，睇吓恩祈笑得幾開懐，我做媽咪見到佢這樣快樂我都好安慰。