因為上個月見到新華有$2012的韓國滑雪團，而且仲要有得坐國泰早機(去韓國跟團通常都係零晨出發坐慘無人道的短程"靈魂機")，所以啦啦聲報名。
今次只有我同恩祈去，第一次兩母女去玩，初時有啲怕(我有差唔多成十八年冇去過韓國)，怕凍親、怕被導遊欺騙、怕冇時間自由活動(好想離團去Kidzania)，結果.....超乎想像的好，個Escort Guide好到冇人有，天氣佳又不算冷，自由時間勁多，十個Good!
2012.02.17 老公送我哋機，食完早餐仲帶我地去睇機場一個名為"流金歲月"的懷舊展覽，啲場景好得意又可以同恩祈介紹吓昔日的香港生活，佢好有興趣。
上機前老公買咗香水比我補情人節的禮物帶走，恩祈愉快的上機戴咗呢個勁搞笑眼罩瞓覺。
三個小時左右到咗仁川機場，出面應該係零下五度左右，團友話上車前見到有幾粒飄雪，今日其實都算係咁多日之中最感到凍的一日，但都o.k.係有風時就好凍咯。
第一站去一個叫法國村Provence的地方，冇乜嘢睇都係影吓相咁。
下面個公仔係唔係叫"草莓妹"呀？
有水的地方都結成冰，恩祈在冰上溜走好似溜冰好開心。
離開後就番水源區(都幾遠)的酒店New Rasung.房內有wi-fi好方便，行過對面食韓式餃子滾滾鍋，份量好少(圖中係四人份)但恩祈好鍾意食，佢食得最多，個導遊James好好人加咗少少豬肉比我哋。酒店附近好方便都幾旺，搭電梯仲可直達Lotte Mart補充食物，韓國啲嘢好似日本(環境都似好乾淨好自律)但價錢就平得多，抵玩！
沒有留言:
張貼留言