Jelic跳級 level 3 + 學跳芭蕾舞(3歲8個月)

上星期五上完IC montessori class後 Miss Helen突然話恩祈可以開Jelic 簿仲跳級由level 3開始，恩祈只係暑假番咗兩個月然後十二月再開始total三個半月，而且第一個月仲好唔得(唔主動做又唔識做加唔用腦)，當時Miss Helen的評價好低，一直都只係試玩未能正式開簿記錄，但估唔到咁快佢就開咗腦，今次仲用心主動去完成咗2個Jelic box(每個level有60個智力寶盒)，Miss Helen話佢番咗學後識多好多嘢變咗好多，而且能力仲已超越Jelic Box的level 2.就由level 3開始啦！另方面Miss Helen亦稱讚恩祈的人格方面超好，除自我能力好外亦能顧及其他人(肯教人同幫助人)甚至愛護物件(佢對動植物甚至死物都好愛護同珍惜).......我聽到後真係感覺好窩心，初初恩祈歲幾時行為有問題我至接觸蒙特梭利教育，由上家長班、親子班到現在Jelic班，三個階段都令我哋學咗同得益好多，感謝IC導師令恩祈行為改正，連智力發展同知識都開發埋確係我意料之外。

由上周六(2010.01.16)開始，恩祈仲正式上芭蕾舞幼班，係佢第一個興趣班，佢對芭蕾舞真係好有興趣，著起套芭蕾舞衣成個唔同晒，有晒淑女儀態好靚呀！

自己練習舞步

優美體態加上善良的心至係公主

恩祈話芭蕾舞堂12位同學有一半都係佢上幼A班同學，仲有兩個係男仔呢！第一堂佢話教咗啲手勢同對腳"開門關門"(即係開合腳掌)，而佢自學的大部份姿勢都係從Barbie 卡通"胡桃夾子"同芭蕾舞dvd中學的。

夢想快啲學"足尖舞"

佢叫一字馬做"一字腳"，只可維持一兩秒。

小腳穿上加細碼的技巧鞋真可愛！

******************************************************************

養咗個幾月的石竹花終於開花，好似幾大朶喎！

其實係好似營養不良好細朶咋，今日要交番學校啦，養咗成個月居然有啲唔捨得......在我家居然養你唔死，返到校園祝你生活愉快、快高長大！