吃個簡單早餐，九點在lobby等專車接去碼頭，如果住得遠七點半就要開始上車，接晒所有酒店客再到瓜鎮接埋我哋。
好快到咗碼頭，今日我哋去浮羅交怡必遊的芭雅島珊瑚海洋公園。
唔駛一個鐘就到(啲船有冷氣又大又定好舒服).....呢度就係浮台，要貴多一倍價錢，其實即係大堡礁啲舊浮台，都多餘嘅，困著係度人又多，大堡礁的靚浮台都玩過啦，梗係去沙灘玩自由好多。
參加浮台團就係咁咯......我哋喺beach都可以游過來玩。
個beach唔大不過靚好多，間屋仔就係集合擺嘢兼食飯地方。
今次帶咗好多麵包嚟，恩祈比上次去布吉蛋島大膽咗，唔再怕魚仔咬腳，不過初初都係在淺灘玩，不太多魚游過來。
後來佢大膽咗行出啲就越來越多魚
我哋引啲魚游嚟，國內游客居然網佢哋玩，阻住人哋影相，到用部防水相機落水時，啲同志猛叫："你部機入水啦！"跟住知道係防水又大叫："部機好勁呀！"唔係化？
十二點開始可以番間屋仔食飯啦，個飯雖然唔係熱的但幾好食又多喎，仲每人派一支水一罐可樂同一個apple.都幾豐富，仲可望住靚海景食，唔錯唔錯！
繼續玩水，見到鯊魚仔。
爸爸潛入水中影鯊魚
佢越游越大膽，游到海中心，仲不停衝住啲海浪玩，佢唔怕海水鹹，我哋問佢知唔知點解海水咁鹹？佢答：落咗好多鹽喎！
仲有包餵魚仔，真係好玩，啲魚啄啄吓，嘴仔伸晒出嚟搶食。
今日好好天，海都有兩三隻深淺顏色，好靚又好舒服。
碼頭底啲魚更密集，靚過同水清過沙巴同布吉好多。
大約三點離開，先返浮台放下救生衣同浮潛用具，再搭大船返瓜鎮碼頭。
四點多到碼頭，遠眺浮羅交怡地標大神鷹。恩祈好攰在船上已瞓著，落船後都要爸爸抱抱。
沒有留言:
張貼留言