十二個月

2007.05.15    76cm  8.22kg  頭圍45cm  昨晚發夢笑出聲，今日一歲生日早上影樓拍照，晚上意粉屋生日會。
2007.05.17    打一歲針，今次居然無發燒，兒童監察合格
2007.05.23    推凳仔純熟，不會跌跌撞撞，單手企立
2007.05.24    有意識的叫爸爸，之後常常叫，而且叫得很嗲很好聽，爸爸樂不可支，卻氣死婆婆和媽咪，又學會拿起聽筒扮聽電話
2007.05.27    仍未敢真正放手行路，非常慎重和怕死，卻學會上樓梯，另外聽到婆婆咳會拍拍心ロ，害怕時也是拍心ロ。
2007.05.30    旅行夢碎
昨日才比晒錢永安訂6月11-15日去沙巴機票，今日就打來話全部酒店都無房，比佢激死唯有退錢。反正恩祈都未行得穩，過多幾個月安排好d至去玩過。
2007.05.31    今日學會唧人，而且模仿能力極强，看到爸爸食香口膠，會放一小塊紙碎入口中狂，但又不會吃下。
2007.06.01    今日終於望住我叫媽媽了，不過仍是叫爸爸多。第七隻牙長出了，第八隻正在萌芽。
2007.06.02    在La Campagnie同一個三歲男仔因争玩車呔盤打架，狂抽到個男仔喊，見到人哋媽咪嚟到立刻停手自己玩，精過鬼！
2007.06.04    隔離的四歲鬼妹仔鄰居Jasmine帶恩祈到東堤灣畔的club house玩，好多架車仔同玩具玩，玩到恩祈唔捨得走，以後又有好去處！

2007.06.07    今年隻烏龜又生了一隻蛋，好似是大龜生的，因牠用後脚像抓沙，今次仲有蛋黃，但不知如何照顧只放水中，過往的蛋不是碎了便是乾涸，老公仲話要整龜蛋三文治。

2007.06.09    今朝早居然仲曉叫daddy，我教她叫媽咪，仲要連續地daddy、daddy...激到我紥紥跳，阿媽話叫爸爸先下次一定生仔。今日仲見到她靜靜雞攞支牙簽學爸爸new牙，好似好危險？又唔係喎！佢似模似樣仲笑吟吟，佢識得唔會傷害自己，天生嘅！

2007.06.12    麥當奴姐姐見恩祈望住汽球就俾個佢，她不接然後望住daddy，daddy話攞啦她才接過汽球，讚她叻叻她就開心地拍手。

2007.06.14    明日13個月大的恩祈，在文東路公園終於踏出她人生的第一步啦！ 
仲上埋樓梯呢！

表情多多，愛誇張地笑，愛憎分明，有主見，你話唔得，佢話"得架得架"！
吸收能力强，愛講太空話、愛用手感受風的阻力。
時常望住人笑逗人開心，抱起她卻過度熱情地狂吻及用頭狂撼，係人都怕咗佢！她是只可遠觀，不可褻玩。
滿一歲後我的麻煩多了....但仍主張自由發展，即是安全情况下由她探索，她喜歡怎樣都可以。
她有很多不良習慣我都欣然接受: 例如不肯自己飲奶食嘢、要抱着才睡。
但這些又方便了我，例如能快速飲奶、因要人餵食因此很乾凈，又可控制她何時睡覺。
她又不是不懂只是懶和嗲，就讓她享受下。
她也有良好習慣令我放心：從小不會亂放東西入ロ中，而且從小已會將稍硬的食物吐出來，生怕毒死她似的，懂得分辨危險，最經典是有一次笑笑ロ在口中慢慢吐出一根魚骨給我，真利害！
每樣東西都會慢慢學到最好才會做，例如走路，常常練習小心奕奕但不會跌到，她是一個認真的人。