在酒店吃過很簡單的早餐後(只有各式麵包多士、沙律和咖啡供應，但很新鮮)匆匆地推著BB車狂奔十分鐘就到達沖繩巴士公司，趕及參加0845am出發的中北部一日團，由於公共巴士車程長加上車費昂貴，必須跟本地團最省時著數，每位成人收費只是5400yen包含一餐午膳，六歲以下兒童免費，我懂一點日文還可以應付呢！
今日天色晴朗，藍天白雲，出了那霸市後便是連綿不絕的美麗海灘，約個多小時車程到達沖繩最出名的名勝-----萬座毛
在萬座毛拍完照便離開，下一站是今次旅遊的重點-----海洋博公園，先在旁的渡假酒店吃過午膳，當我還未餵完大小姐的午膳前(當然自己都未食)，所有團友都匆匆吃過就走了，是為了爭取更多時間參觀，可憐我帶著一個豬頭加一個小B要在1.5小時內完成最好睇的表演和行程，真係趕到氣咳，個豬頭重話要扭蛋話好有紀念價值，結果用200yen扭咗一隻龜蛋，遲咗5分鐘上車，啲日本人好準時架。
下一個行程叫今歸仁城跡，係世界遺產，有啲似係沖繩的萬里長城，面積僅次於首里城，山上的風景很秀麗，同恩祈影咗很多相片。
恩祈試咗呢世人第一啖人間極品，就係本地最出名的Blue Seal紅芋味雪糕，可惜佢唔識食，唔敢咬又唔識 lam，只係好心急用咀唇印印下又 lam吓脷，好搞笑！
最後一個行程是我渴望去的菠蘿園，因為可以乘坐可愛菠蘿造型的遊覽車"菠蘿號"遊園，不過原來係冇嘢睇好失望，好彩最後有個極大的試食中心(其實係售賣部)試咗好多菠蘿汁、菠蘿酒、蛋糕、餅同唔同款的菠蘿片，試番夠本飽飽的滿足地走人。
回到那霸市已六時多了，便在附近的Ryubo百貨地庫餐廳吃了類似健康餐的套餐(以豆類為主食)和苦瓜炒蛋套餐(老公死都話唔係苦瓜，沖繩的苦瓜係唔苦好味架)最後又上了玩具部玩遊戲機，玩到差不多人哋要收工，又要拉扯著賴死不走的恩祈才可結束今日的行程。
沒有留言:
張貼留言