Hotel check out 啦！大堂古色古香，影多張相先，背後係清末古車。
今日天清氣朗，唔知點解冇去行程的國家奧林匹克體育中心，只可從車上影"鳥巢"和"水立方"好可惜！
之後去咗"足浴"，其實即係洗腳，重點係賣嘢，爸爸之前扭親腳腫腫地，因此被推銷買咗浸腳的藥包，一盒盛惠三佰大元人民幣。
最後一個行程係奧運紀念品專賣店同買零食手信，啲"福娃"公仔細細個都好貴，冇買只係買咗啲磁石貼送俾人紀念，門口有同恩祈差唔多高的"福娃"公仔影相好靚，佢哋叫"貝貝"、"晶晶"、"歡歡"、"盈盈"和"妮妮"，即係普通話"北京歡迎你！"
午飯後就要去機場，因為新機場好大又怕人多早啲去，結果比預期快搞掂但真係太大，由入到機場要搭"無人駕駛"再行到閘口，凈係行要半個多小時，可能係我去過最大的機場，因為早到裡面有中式花園就坐下休息。
閘口有這種依照人體體形設計的躺椅，真係好正，本來腰酸背痛的我躺了幾分鐘就舒服晒，重可以望住出面飛機升降呢！
===============================================================
今次個北京旅行團真係平靚正，食住車都好，不過我係好後悔跟團，原來現在北京自由行都很方便，不會貴也安全，我哋有老有小跟團好唔方便，冇自由跟唔上影得相嚟又遲到，不能玩味真正的北京之餘又要搶食好討厭，早出晚歸bb都只係每晚瞓到七、八個鐘好辛苦.........
不過北京之旅都係好玩同好開心，比起二十年前(我上次到訪係六四前夕啊)真係極大變化，非常先進華麗的大都市，以前的王府井是古老大街，現在卻變成銅鑼灣，但係又完全失去了以前的味道，人真是奇怪，後生時最憎番大陸嫌老土不懂欣賞，現在人大了又覺得以前個老土樣至有風味，但只能緬懐一番了。
至於恩祈在北京除了學識講普通話"謝謝"、"您好"之外，由於接觸人和物多了，明顯精靈咗同講多咗嘢，加上有兩個愛逗她玩的哥哥令她全程在車上笑不停，在景點又不停的跑跑跳跳(地方大)，就算將來冇印象曾這樣快樂過也不錯啊！My happy baby I love you！
沒有留言:
張貼留言