三十二個月

恩祈兩歲八個月，最愛黃色，佢唔怕唧腳板底，最近在屋企肯去大人廁所(出街只要係座廁就一直o.k.)，仲要關門。

記得屋企電話號碼，唔會同daddy電話搞亂啦。開始少量中文認字：大、小、上、下，由於好少練習都唔係太記得。數數目1-5好叻，肯揀英文卡通睇，對英文有啲信心啦。運用"你、我、佢、因為"等用詞都很正確，亦肯學正確發音。有次同佢講爸爸靚仔，佢居然答：睇唔出喎！在2月6日，第一次聽到佢自發同我講：多謝妳！我愛妳！very sweet!佢係一個好懂得感恩的孩子，好鍾意講多謝。但另方面有時會好執著，情緒突然失控，甚至顯得歇斯底理，只要暫時不理睬比時間佢冷靜，好快就會平復同後悔，然後就會表現出更可愛乖巧，此時才講道理。因此孩子是打不得的，打只是大人發洩和不理解，小孩是不怕打只會更曳。

性的疑惑？
由於恩祈由兩歲開始已對自己和兩性身體抱有好奇，加上我們下月要去日本浸天體溫泉，不得不提早進行性教育，買了這本坊間熱賣的"我從哪裡來？"(隔離本烹飪書係同時買的，係我blog友何師奶寫blog寫到出的書)，呢本大書圖文並茂，初時我睇都覺太直接大膽，連婆婆都話唔好比佢睇，但我認為性是自然的、美好的、不須忌諱的，因此我任佢睇任佢問，佢揭第一頁就指住男仔器官問我：咩嚟架？解答完後佢都好少再問，不時都拎本書自己睇，最有興趣係睇大肚同bb點嚟，佢呢方面的學問佢真係超然，但佢真係變得對兩性好自然，冇o甘有興趣啦。