三十三個月

兩歲九個月的恩祈92cm,仍然係12.2kg.認得中文字有：大、小、男、女......其他的表現番轉頭，但似乎係玩嘢，好似數字同英文字母，叫佢讀又唔讀一係就亂講，2就話係3之類，叫人都係，一係掩眼扮睇唔到人，一係就見到姨姨叫伯伯、見到婆婆就叫哥哥，氣到我死就咭咭笑，極為古靈精怪。

不過好鍾意讀書，有時仲將啲公仔排排放在床上，讀本書比公仔聽，我偷偷地聽到佢好用心講個樣好得意，佢仲主動用手指做筆順學寫數字和字母，現時是不適合用筆學寫字，因此我很高興她能自學練習手指寫字。最喜歡的書就係廸士尼本公主書，臨瞓前一定要睇過至安樂，當然熟讀所有人物除非我都唔識(好似"風中奇緣"個女仔我就唔知只係叫佢做印第安姐姐)，而我同佢講"灰姑娘"的故事，叫佢乖啲溫柔啲將來就會有王子搵佢，佢居然苦著臉話:"我唔要王子要媽咪呀！"仲有每次我在Taste買餸排隊比錢佢都會在門口書櫃前一路睇書一路等我呢。

食完飯之後佢會安排好話:"爸爸洗碗、婆婆休息、媽媽陪我玩！"當然事實並非如此啦。每早起身就會問:媽媽今日我哋去邊度玩又或者食啲乜嘢？佢依家最大任務就係食同玩。活動方面除咗去遊樂場就最鍾意同爸爸去倒垃圾，因為倒完就會在走廊嬉戲玩一陣"123紅綠燈"，係佢哋最歡樂的親子時光。