2010.08.13 今晚九點在機場集合，爸爸有送機仲同我哋影相。
好耐冇搭有電視睇有飛機餐食的正常飛機啦。我哋第一批上機，QF啲男空中服務員對我哋幾咁好service呀！我都未試過有人肯比我同肯幫我將部bb車放上我頭頂個行李架，其他行李都幫我放好，仲即刻比兩份唔同款嘅child kit送比恩祈，仲好nice係咁同我哋傾計，不過佢講得太快我都唔知佢講乜，淨係識答thank you!
好多芝麻街嘅kit呀！本activity book仲好多嘢比小朋友玩，好過CX啲 kit好多呢。一上機又每人派支水，早知唔係候機室買啦($16支細水!)。
恩祈食完個dinner大約十二點就瞓到朝早六點派早餐才醒，好精神地迎接今次的澳洲旅程。
2010.08.14 當地時間九點幾到達，可能有老有小，過關好快冇搜過(之前次次去澳洲都翻箱底搜)，由布里斯本去到黃金海岸的Movie World華納影城都未到中午十二點。
婆婆喺香港成日冇神冇氣，去到就話唔知啲精神喺邊度番晒嚟。呢啲就係"旅行的魔力"。
Movie World我第二次造訪，上次嚟個天都係咁鮮藍......應該話Gold Coast個天成日都咁鮮藍色！
呢兩個唔知乜嘢俠恩祈唔肯同佢哋影相，咁我影啦。團友可能唔識用我部單反機，影到好似打冷震咁。
呢度好細，細過香港迪士尼同新加坡環球影城好多，仲要多數係過山車同跳樓機呢啲刺激嘢玩，即係冇乜嘢啱玩。但係勝在人少少唔多駛排隊，舒服。
東瀛遊有個安排：就係會有卡通人物專程陪我哋影相。
仲每人送一張相加靚靚相架，又影得幾好喎！好似一張要成AUD$20。
恩祈剩係鍾意同翠兒玩，話佢肥嘟嘟好得意，冷落咗賓尼兔。
跟住去買啲嘢食，個Kids Combo成A$9.95(支士多啤梨奶好好飲)，加埋杯Latte同Tuna Roll就成百五蚊啦。雖然大大份又幾好味但始終係凍冰冰，結果三個人都食剩好多。
上面間似鬼屋嘅嘢聽講係會向後拉的室內過山車(咁咪似USS的Mummy？)，冇人排隊好想玩但又唔放心佢兩個喺外面等唯有放棄，就去咗睇下面個show.
原來係飄移表演，真係好神乎其技，連我呢啲有車牌但唔識揸車嘅"車豬"都覺得好精彩，比十個"讚"佢！
見到Batman咁有型梗要合照(其實佢好驚係死頂)。
好在有呢個Kids Fun Zone比恩祈玩，唔係唔知點算。
嘩！bb跳樓機呀！恩祈第一次就超級愛玩啦。
啲小朋友表情好開心又好搞笑呀！有啲玩到飛甩鞋。
呢兩隻嘢一個好似叫阿寶一個叫乜嘢呢？
(係咪小鳥咇咇？) 
呢個小兒科River ride又幾好玩，到最後會經過一個大瀑布以為會濕晒，嚇到我哋死死吓，我仲話駛唔駛咁勁咁多水呀！原來去到最後個刻只係得番幾滴水落嚟，幾刺激呢，真係冷汗都標埋出嚟。
賓尼兔都攬攬樹熊。
如果係夏天，恩祈實跳入去呢個水池度勁玩。
三點半開始Parade啦，好小型但好親近呢。
好耐冇見嘅神奇女俠，仲有皮鞭貓女。
睇完Parade又趕去睇Sherk 4D.睇怕都好少細路可以好似恩祈咁在一年多時間內，去過三個唔同國家(日本、新加坡、澳洲)睇過三次4D史力加啦，真係幸福要懂得感恩至得。
五點離開Movie World.呢度開始係春天大約六點天黑，導遊比我哋落黃金海岸個灘影吓黃昏相，個海係東面只有日出睇而冇日落睇。
佢兩位小姐唔肯落車，我只好影吓團友(個團有43人！)同風景。不過係親眼望靚過影相好多好多......
然後車番酒店小休一會。
酒店叫Watermark同海灘只隔兩條街，後面條街行前啲就係shopping街好旺，地點都唔錯，間房又好大，瞓四個人都得。不過見到啲毛巾唔乾淨總覺啲嘢唔夠清潔扣咗分。
到咗七點半導遊帶我哋行去好就近的麗晶海鮮酒家食晚餐，我哋見冇乜錢駛(一個optional行程都冇join)就order隻鮑魚食吓，A$60約hkd$420一隻！影落好似好大隻其實好鬼細隻，味道？鮑魚味咯，冇乜特別。
我細個好憎鮑魚陣味，我以為恩祈都係啦。點知佢食完又要食，食咗差唔多成半隻咁多。而家啲細路幾識食呀！
其他餸有避風塘加菲蟹、香煎昆士蘭蝦碌等，我覺得太過鮮味有啲過鹹，但恩祈同婆婆就食咗好多飯餸。
到咗夜晚條街好凍，得番十度八度，要著番件厚褸，同中午溫差相距成十幾度。今晚早啲瞓，明天嘅節目好精采！
沒有留言:
張貼留言