2010.08.15 (今日恩祈四歲三個月啦！)昨晚瞓咗成十個鐘，好好瞓好舒服，因此個個都好精神......打開個窗，Gold Coast個天空真係特別醒神，都望到少少海景，主要係比最高的地標Q Deck擋住，明天free time我哋都會上去睇吓。
向下望到個泳池，咁凍冇人游水，不過早晚都見有人去浸個熱水按摩池。跟住就落餐廳食個自助早餐，唔駛講呢度啲牛奶同雞蛋係特別正。
早上的節目就係歡樂農莊！地方好大要坐佢哋嘅接駁車入去。
首先當然係排隊比錢同Koala樹熊合照，我影過N次，不過呢隻係最肥嘟嘟最可愛的一隻，因為恩祈抱唔起又係由我抱，上面張係我部相機影下面張係用佢哋部機.......我想蹲下就番恩祈的高度點知唔比，所以恩祈好似抱住Koala個pat pat咁，佢好鍾意Koala，影完相都係咁摸啲毛(呢隻啲毛居然唔硬仲滑到似毛公仔呢)又錫咗佢個pat pat一下。
我都未見過跑來跑去咁活躍的樹熊，通常都係樹上瞓覺嘅。
婆婆都要同Koala & Kangaroo 合照。
餵袋鼠係小朋友難得的體驗(都話喺澳洲餵袋鼠係唔駛錢啦！)
婆婆差啲抱唔起隻小綿羊，佢話有成三四十斤重呢！
甩皮鞭表演，恩祈話似Batman貓女的皮鞭.......駐場攝影師見恩祈得意，就從袋裡送隻小樹熊公仔比佢。
個show跟住仲有牧羊狗趕羊、飛回力標同擠牛奶。
啲羊乖乖被趕番晒入羊欄，個樣好趣怪。
恩祈第一次接觸乳牛個"奶奶滋"，哈哈！佢話淋淋哋好似綿花糖咁。
又用草引隻牛。
玩到啲人走晒我哋仲喺度，個鬼佬仲教恩祈正確擠牛奶的手勢，佢話真係擠到見有一滴奶，但冇滴落嚟，可能唔夠力度啦。
隻乳牛的眼神好似話："你哋玩夠未呀？"
呢隻係剛才表演趕羊的牧羊狗。
又去同羊咩咩玩多一陣，好可愛呀！
離開大牧場前遇見罕有的羊駝，樣子很淘氣，高度同恩祈好相襯呢！亦見到駱駝隊伍，恩祈好奇的觀看.......呢個Aussie Farm好多動物近距離接觸，對小朋友同愛動物的人(我講我自己呀！)真係好開心，不過後來至發現原來我哋漏咗去Animal Nursery.有得餵牛仔bb飲奶，佢哋搶住飲好得意，我同老公以前都試過但恩祈冇得試好可惜呀！
沒有留言:
張貼留言