早上0710am集合，爸爸冇份去，昨晚佢番通宵今早收0730am,我哋搞掂出境佢就直接在機場裡面等我哋食早餐，又係送機送到閘口同恩祈kiss goodbye!
同國泰個空姐姐姐握握手，就準備起機可以睇卡通片啦。
個兒童餐同大人餐係一樣，只係換咗七彩兒童餐具，而家去日本居然冇雪糕同冷麵食，比以前真係cheap咗好多。
大約個半鐘頭就到達台灣，可以落機逗留機場半小時，又要check hand carry.但係我帶咗支水佢又check唔到比我過，真係豆泥。
今次上機派咗呢set child kit.恩祈即刻換咗呢個mickey backpack。
台灣密雲，來到日本天晴呀好嘢！我個發"毛"相機影親藍天左上角粒有腳霉點就現晒形，我又冇時間攞去Nikon整，真肉酸。
又被導遊安排坐在頭兩行位觀景位(有老有小嘛!)，婆婆一上車見到有另一位老婆婆坐隔離行，就"大"人哋問人幾歲，點知位婆婆答：90歲啦！恩祈婆婆即刻啞口無言，人哋老佢十年仲行得快過佢又食雪糕，佩服佩服！
三點幾到，過晒關上到車四點幾，出到名古屋市中心成五點幾，好在依家踏入初春要六點幾至天黑，冇o甘蝕。
人哋行地下街，恩祈就在地下街前跳part舞先。
其他團友唔夠時間行街(有兩個鐘頭行)，我拖住婆婆同bb就最怕行得耐，一個要玩一個要上車坐，好彩比我上番地面搵到間百貨公司，即刻上玩具部，日本公司好多玩具開晒比小朋友任玩又有枱椅，恩祈樣樣試玩婆婆有得坐陪佢，我就可以放心一個人行吓公司，幾醒！
今晚第一餐團體餐係呢個手桶御膳，依家日本跟團係一人一份餐o甘好架(十幾年前唔係，要一齊分仲要份量好少又難食)，我哋三婆孫一張枱幾好呀，個桶啲嘢食好味呀，尤其碟刺身佢哋唔食我食成三碟真係大滿足，碗飯同粒士多啤梨都好正。
今晚住間Royal Park Hotel係名古屋市中心，啲團友仲話行咗去名古屋城睇夜櫻幾羨慕呀！婆婆要休息啦恩祈又最鍾意在房間搞搞震.......間房好大呀，比我哋自己去日本住啲business hotel大得多，起碼多咗張double-bed,個廁所都大啲，恩祈又要影吓得得意意的出浴照。
沒有留言:
張貼留言