搞到一點四十分至離開動物園，立即跳上的士，半個鐘到達聖陶沙島上的Resorts World.(車費S19.8.平！)，囡囡只係瞓咗呢半個鐘，一到即刻彈起身真好嘢，的士站在賭場樓下個層，搵咗一陣至搵到環球影城。
個地球咁細個嘅？連個樂園都超細，比大阪個USJ仲細，門票正價S72真搵笨。
入咗場後到guest services換咗2套S10 餐飲同S5購物的voucher，只係soft opening至有，當彌補番冇得玩超級過山車同木箱漂流記的損失(兩樣玩意係冇開同未開)，但肯定係彌補唔到.......順便問吓生日有冇禮物，搵咗一陣就送咗個USS Mummy Pin (價錢牌寫S7.9)，多謝晒，恩祈又免費入場。
雖然係周末，入咗場都見唔多人，求其影啲公仔合照，恩祈見到科學怪人好恐佈好驚，而史力加上次在日本影過都唔排隊影啦。
冇得玩木箱漂流記，嚟馬達加斯加除咗影相，仲可以做乜？
只有個Party-go round玩(迴轉木馬)，唔係化？ 你玩啦！
Far Far Away遙遠王國個史力加城堡就最靚，Sherk 4-D Adventure居然唔駛排隊直入，雖然同上次去日本USJ睇個4D係一樣，但今次講英文就聽得明啲，而且一樣非常精采，百看不厭！
跟住去排隊(排咗20分鐘)玩Enchanted Airways"小龍飛行學校"，係身高92cm以上(即係大約2歲幾)就可以玩的細路仔過山車，咁我呢個唔玩得大人過山車嘅人以為好小兒科啦，點知同真嘅一樣有爬上衝下會離心同"茜"嚟"茜"去，只係輕量級同短咗，對我嚟講啱啱好都有啲驚驚地，偷望吓隔離個恩祈雖然冇出聲但雙眼仔紅晒淚汪汪咁，差唔多到時我至敢問佢係咪好驚？佢居然紅著眼笑住話唔驚好好玩想玩多次。
幾時變得咁勇？定係我好廢。
冇得坐A380就坐吓D380(D for Dinosaur)！搞笑！
下一站係Lost World想睇"Water World"，有少少時間就去Discovery Food Court食嘢先
叫咗蝦麵、Laksa、Kids Set同兩杯嘢飲，都唔算貴total S30.扣咗S20 voucher即係補番S10.恩祈個kids set只係S8.8包飲品同甜品仲有個可愛啄木鳥lunch box送。
尋晚瞓覺有啲喉嚨痛，好在起身好番，但經過一日勞累加上食辣嘢飲凍嘢，最後我冒死食埋碗laksa就宣佈封喉，開始講唔到嘢，抵死！
恐龍餐廳啲冷氣太太太舒服啦，結果出到去個show都做完啦，算啦，反正恩祈我估都驚驚地唔鍾意睇而我以前喺美國都睇過，係daddy冇得睇佢唔好彩咯！
周圍都有恐龍足跡.......我哋同daddy決定兵分兩路，佢要玩侏羅紀河流探險......
我一早為佢班定即棄雨衣，因為一定濕身......據佢話有兩位乘客係會由頭勁濕到落腳，不過唔會知係邊個位，佢話佢冇中招但件雨衣都濕晒，仲有佢話覺得個game麻麻地好玩。
預計daddy玩Jurassic park排隊連玩要一個鐘頭，我同恩祈去玩"尋寶奇兵"
冇冷氣之下排咗40分鐘，又熱又攰........就係為咗比恩祈做司機。
我叫佢做迷你版mummy.低b到死，場景又假到死，排咁耐玩幾分鐘，比我鬧死。
玩完上樓上平台欣賞吓風景，見到有得睇冇得玩的兩大遊樂設施，大人千祈咪嚟住呀！冇嘢玩。
番去恐龍foodcourt涼冷氣等埋daddy.已經六點，距離關門時間只有一個鐘，見到Ancient Egypt的木乃伊復仇記Revenge of the Mummy.我冇睇錯呀！最最最受歡迎的遊戲居然冇人排隊玩，係完全冇人.......我真係冇諗過我都有得玩，我同老公輪住玩完都未駛半個鐘(唔駛排隊條路好長都行好耐)，有啲似disney的space mountain室內過山車(室內的過山車我又唔會驚喎)，不過好玩刺激驚險同靚好多，好值得玩，推介no.1
恩祈未有得玩Mummy住，不過佢都唔想玩.........呢度啲埃及佈景好神似！
差唔多六點半，行到Donkey Live就開show.呢個玩意似disney個史迪仔互動game.有啲好笑但都係悶悶地，冇USJ個互動真人show咁精采，失望！
一出嚟見到"魔法轉輪"諗住比恩祈玩番轉，點知剛啱七點要收工，見到右下角有個人的比例就知個摩天輪迷你得幾緊要又冇嘢睇.....唔玩都完全冇損失。
黃昏亮燈啦，史力加城堡變成粉紅色好靚好浪漫咁呀！
Hollywood部份的餐廳同shop係未close。我覺得USS好衰，起初假期係收夜晚九點，最近居然收七點，然後收本地人S2入場費可入Hollywood.影吓相同消費(樂園入面冇乜本地人玩嫌貴)，連theater都收埋錢放電影比本地人睇，咁嘅縮數都諗到(我都未講臨場sell雨衣同玩mummy要放bag落locker過咗半個鐘又收錢嗰啲)假期收多人S6蚊又唔延長時間為咗賺多少少本地人錢，好cheap！其實最主要係如果比我哋玩多兩個鐘一定玩得晒啲嘢同睇晒啲show.......唉！都係冇玩到啲細路仔嘢算啦！而家大人只有三樣嘢啱玩：Sherk 4D、Jurassic同Mummy.仲有睇個Water World show.連parade都冇，日本USJ只係貴少少好玩好多。可以嘅話遲多兩年至嚟多啲嘢玩，現階段就好唔抵玩，平日更加唔駛排隊半日就玩晒。
搭monorail出番市區好快好方便，原來只係入嚟收車費(我哋搭的士入嚟都唔駛收入島費)，出番去免費。
番到Vivo City上咗去原裝"大食代"，叫咗兩客三巡海南雞飯，一客S6.5.平過又好食過東涌大食代好多好多....... Vivo City好多嘢行但好攰，搭咗幾個站MRT番去Little India休息休息。
恩祈四歲生日的動物園+環球影城豐富節目結束啦。佢都Happy呀！
沒有留言:
張貼留言