今日好好天，食咗個唔多好食但原來係咁多日最好食的早餐後，出發去富士山區，途經舊東京鐵塔，新的就落成將會是新地標。(不知為何每次去日本支舊鏡就發mo.右上角個點呀！之前又冇事喎，早知唔帶呢支鏡啦又冇鏡換，又係影親藍天就現啦
)
中途休息站。而家日本的雜誌本本都有袋送(橡根紥住個啲)都係600yen左右一本，抵嘅，我以前最鍾意睇non-no期期都買，不過隨住我由沉迷到討厭日本後(我係由帶團到日本見到繁華友善的另一面開始改變，因此興趣同工作未必共存)已經冇買過。
兩小時車程到達箱根平和公園，四周圍都係藍天，偏偏恩祈身後的富士山頂就有片雲海，富士山好怕醜，以前去過咁多次都係見過兩次真身咋。
半小時去到御殿場Outlet.先到foodcourt買嘢食，好似1000yen有麵有飯，另再加買多兩件壽司都幾平又夠飽啦，恩祈仍有未清的咳，對雪糕甜品只可觀賞，我就可以食，佢真係可憐！
呢度好多人帶狗來，如果同狗仔影相啲主人好開心好似好有面咁。
今次來日本破咗歷來最高匯率，100yen=$9.55！(試過最平對$5最貴$9)有鬼嘢可以買咩？尤其連MikiHouse大部份都變成made in China.不過在GAP Outlet買咗件Jacket比恩祈，3400yen半價1700yen就好抵咯，同款女裝都係2000幾yen不過最大都係S碼，只好放低走人........
最後一個行程去"忍野八海"。係八個由富士山上的冰雪融化而成的水池。
啲富士山雪水好冰凍。
第一次食新鮮熱辣辣的即燒大草餅，おいしい！
恩祈執地上的紅葉玩得幾開心。
呢度終於可望到富士山全景，可惜已近黃昏......唔緊要，希望在明天！
返到富士山溫泉酒店，有少少時間去浸吓溫泉先，不出所料我哋兩母女包場，就可不怕醜光脫脫玩水，早知帶埋相機入去啦。恩祈被我說服下第一次浸溫泉，上次去和歌山佢話怕熱水點都唔肯制呀！不過今次佢都只係浸吓下半身，然後就同我揼骨按摩服侍吓我，有呢個女我好歎呀！
浸完喺嗰度沖埋涼就行去餐廳食自助餐，我哋個團除咗早餐外只係包三餐，呢餐算係最好，我最鍾意食佢啲森永雪糕(恩祈又係冇得食，哈哈！)不過佢有新朋友晴晴，佢哋好玩得埋，晴晴大恩祈唔夠一年但高佢大半個頭而且有五十幾磅咁重，恩祈得三十幾磅咋。但係朋友唔分肥瘦嘅。
今晚間房係西式唔係和式tatami，恩祈冇得著住浴衣捐來捐去，冇晒特色唔好玩嘅。
沒有留言:
張貼留言