日本東京富士山五天團@ DAY 1 2010.11.04

2010.11.04    今朝恩祈都有番學，上完英文堂十點半接佢放學換衫出機場，十一點多啲到T2, 排長龍寄完行李已十二點，約咗子清在入面間大家樂等，佢今日一點半CX884番美國(佢媽咪話佢知道恩祈去日本後又話要去日本唔去美國喎，呵呵！)，我哋過完關入到去佢已經要準備上機，兩個好朋友Big Hug後就要say goodbye.

我哋搭香港航空HX618.一點半機，佢係上月尾至首航東京，用大機。

daddy送機到閘口就要去番工，我哋就遊埠Happy!

架機好新又多吉位，婆婆同恩祈可以打橫瞓，連小b都有自己位坐呢。

有電視睇仲係闊銀幕，恩祈睇咗"愛麗斯夢遊仙境"。seat位又好坐....今次好好彩準時開機，聽聞好多時都會delay同維修甚至換機。

小朋友有由Senior Purser 同Captain機長簽名的乘機証書。

去到東京搞完晒啲嘢都七點多，導遊比個幾鐘我哋在機場食吓嘢番酒店，不過我哋帶咗好多乾糧。好憎個成田機場，又大又冇嘢行又遠又老土，所以一張相都冇影，最近羽田機場番新又近市區又多新嘢，如果下次去東京用羽田就好啦。

九點左右就番到酒店，都係近機場，成田Marrod Hotel都o.k.嘅，明天至出發去富士山區遊覽。