食完早餐離開酒店先去一間帝皇佛寺
恩祈對拜神好有興趣，一聽到有神拜就好興奮，睇佢貼金箔個樣幾pro.
去到最期望去的老虎仔樂園，因為有好多動物睇，裡面都唔細呀......首先睇吓母豬餵老虎仔，同豬仔扮老虎仔食老虎奶(即係扮豬食老虎)
跟住就係恩祈由香港講到泰國，最渴望的重頭戲~~餵老虎仔食奶奶！恩祈真係講得多一啲都唔驚隻老虎bb,重摸佢耳仔同搶住揸奶樽，但係唔知點解被在場工作人員制止佢，後面隻老虎同豹係假架(舅母以為後面都係真話好驚)，影相盛惠150銖，值得值得！我哋仲想抱鱷魚bb,但係見到條鱷魚size唔似我以前在澳洲同斯里蘭卡抱嘅o甘細條，恩祈抱住嘅比例唔多好睇就放棄咗，下次等佢大啲再抱過。
我哋中途離團去咗睇鱷魚表演，因為Joan話好精彩，睇完去睇豬仔表演又撞番個團，隻肥豬計緊數，而下面班豬仔就賽跑，搞笑！
跟住啲團友去睇Tiger Show,安置好婆婆坐下我同恩祈就去搵佢啲friend~~猩猩，著綠色Levi's衫隻老友以為恩祈有好嘢比佢，仲同恩祈give five.
過隔離探鹿鹿，恩祈攞隻蕉去引佢，點知啲鹿仔好肚餓連皮都搶住食，我搶番驚食死佢，恩祈學我對隻鹿講：唔好食皮呀，食死你呀！
恩祈最喜愛抱的卻是白兔仔，佢個樣幾愛護憐惜呀！可是我一放手佢就捉唔實隻兔仔抱唔到啦！
番去接番婆婆睇得少少tiger show(穿火把嗰啲表演)又趕去睇大象表演(真係好多show仲有其他未睇)，都好精彩，動物真係好叻！
食完午飯真係好攰，在旅遊車上共睡了三小時至醒！係屋企都未試過，可能架車震震吓仲好瞓......連帶去到啲購物點都唔駛落車。
到拜四面神我買咗七色花還神，皆因當年求過如意郎君，雖然老公並不算十分正，總算為我帶來幸褔啊......我拜完後叫恩祈走，佢點都要自己拜神，唯有俾佢拜吓，佢好有慧根，教完拜第一面後就好認真的去拜埋另外三面，唔叫佢都唔肯走，教佢祈禱就學極唔識，可能佢見人人都拜又有個像去拜，唔似祈禱係在心中較抽象。
我求一家平安，唔知恩祈係咪求成日有得去玩呢？
在四面神旁食完晚飯導遊就帶番我哋去前面Aroma Hotel旁的Big C行街，由於在芭堤雅已行過，我哋就過對面個全東南亞最大的高級商場Central World Plaza，問security玩具部佢居然好nice用車載我哋去搭(你話個商場大到用車)，上到玩具反斗城超大超貴又水靜河飛，恩祈任玩任試，佢彈小鋼琴個樣幾elegant.
集合時間就到恩祈玩到唔肯走唯有出絕招---去食雪糕，去到又係一個客都冇，泰國的經濟好差莫講買嘢連行嘅人都好少，可能係連香港人都冇乜至顯得更門庭冷落。講番食呢杯三球雪糕只係69銖($15)，唔好比恩祈陶醉的樣子騙到，其實佢到依家都未識食雪糕，唔識"畢"又唔識咬，佢食飯就叻，食雪糕要靠人餵架！
沒有留言:
張貼留言