今日自由活動，0930am集合，導遊帶想出大阪的團友搭車。今日係唔包餐，而我哋主力玩USJ.唔想浪費時間食飯，因此......由婆婆準備好在酒店自助早餐演變成的悠長早餐，好似包呀、蛋呀、生果呀，居然可以食到夜晚七點至食得完。
在大阪站同導遊及團友分手後，就開始由我帶住婆婆同恩祈轉月台同轉車去USJ啦，係咪好叻呢(其實問吓人好簡單啫)，由神戶唔駛一個鐘頭就到USJ算幾快啦。
今日係星期三平日都幾多人，可能係春假關係，有好多細路，不過由於天晴心情好，加上USJ係我哋今次嚟關西嘅重頭戲，我哋都懐著興奮心情排隊去。
由於好多人已入場(今日開放時間係朝九晚九)，只係排咗一陣就買到入場票，大人5800yen長者5100yen四歲以下小童免費，都差唔多成千蚊入場費，好貴不過好值得。
再行前啲又見到史力加同佢老婆，恩祈第一次見史力加就好鍾意，我估可能又係有啲似daddy的緣故，諗落我老公都似幾多卡通人物，好似美女與野獸中未變身王子前的野獸、史廸仔啦、怪獸公司中的大眼仔啦，haha!係啦，日本的主題公園唔同香港廸士尼，冇話排隊同卡通人物影相架，好多時都係一大堆小朋友攬住一齊影架，大人唔駛諗呀，迫到去個卡通人物度佢見到係大人都會閃架。
第一個玩的節目就係Sherk's 4-D Adverture.見到條隊唔算太長，點知排排吓連玩都成個鐘，但係好精彩呀，好勁3D效果之餘，恩祈話齋張凳會郁架，又feel到有老鼠在腳邊走動，婆婆仲話玩完呢度邊個仲去香港廸士尼睇4-D，真巴閉。
睇史力加排隊時落雨，出嚟又好天不過就凍咗，跟住去我哋第二個目標：大白鯊！
恩祈學佢張大個囗，唔嚇人仲好可愛！
又係睇落唔長龍，點知條人龍彎彎曲曲係深不見底嘅，好在有婆婆供應同樣深不見底的悠長早餐，恩祈一路排一路食又o.k.喎！其實都幾驚嘅，但可能我以前係美國Universal studio都睇過Jaws加上條鯊魚o甘假，我有啲後悔睇咯！我影大白鯊個頭時比個揸船姐姐話，唔知佢係叫我小心啲定係驚我影到鯊魚個假樣呢？
跟住我見啱時間，就去搵定好位坐好睇Sesame street magical market.恩祈坐頭排睇到幾留心。
估唔到又幾好睇，Big bird,Elmo, Cookie monster著成o甘都好落力地勁舞一番，係好勁的跳足半個鐘好掂呀，最後仲請啲小朋友一齊跳，真係難得的機會，點知恩祈唔肯出去好似推佢去死o甘，話佢唔叻佢居然仲話人哋出去跳啲小朋友好曳喎！
上面係USJ最人氣的蜘蛛俠，冇fastpass都係睇吓好啦，而且最少要102cm至可以玩。跟住經過又睇到湖邊正上演PeterPan's Neverland.好盛大的場面，不過個天又開始變臉啦，快啲走去排隊玩遊戲好過。
見冇乜人玩Animation Celebration聽聞呢個好正就去玩咗先......原來係真人同卡通一齊live演出真係very good.睇完恩祈仲講個四眼哥哥比啄木鳥吸咗落個電視入面。
玩完仲有些微雨就去商店街行吓先，啲shop好似唔駛錢好多人排隊買嘢，真係唔敢睇，睇咗鍾意點算又要排長龍比錢......又比恩祈遇上啱啱至睇完的Woody.
佢幾開心仲可以獨佔Woody合照呢！
沒有留言:
張貼留言