離開歡樂農莊，下午就展開翠兒河遊船捉蟹之旅。
只係十分鐘船程，就到泥灘用竹筒捉Yappies小龍蝦，雖然係好淺水我哋都冇落去，我哋背後就係啲團友落去捉，都幾有趣不過好快就番嚟，如果老公喺度一定會落去捉。
團友們努力啲！下面就係Yappies小龍蝦，用來等陣作魚餌釣魚。
恩祈被我捉去同啲哥哥姐姐去捉泥蟹，過程好簡單，只係將預先放下的鐵籠拉起，然後睇吓有幾多隻泥蟹喺入面。
示範綁泥蟹
跟住就係用頭先捉的Yappies嚟釣魚，恩祈當然只係用支魚竿扮吓嘢就算。
翠兒河風景秀麗，未嚟過我覺得呢個行程都好好玩，但恩祈話唔鍾意。
佢太細個，剩係喺度玩碗檸檬水嘅時候最開心。
每人有兩隻生蠔，好細隻但係勁鮮甜，恩祈唔食我同婆婆每人食多隻。
仲有一碟泥蟹，我平時唔食蟹嘅，但試吓呢碟蟹好多肉好新鮮，蟹蓋上啲汁好味同鮮味到飲晒，食到落船至停但係都食唔晒。
為食幟哥同我哋同船，我仲以為EGL咁大面請佢嚟幫我哋煮蟹，原來佢係帶VIP嚟玩坐係上層。
最後一個節目最精采，就係餵塘鵝 .......啲塘鵝知道係時候開餐，會自動聚集，越嚟越多，初時都好平靜，但後來.......
開始餵魚嘅時候就開始顛啦，啲海鷗又唔知喺邊度飛晒嚟想分一杯羹，我叫恩祈比麵包啲雀食，佢自己又要食，啲海鷗見到包都顛咗，定晒喺隔離飛等食，情況有啲令人聯想到希治閣部恐怖片'Birds'.搶食時佢哋又鬧交好嘈呀！
落船後見到韆鞦架啲小朋友又要玩一輪。
呢位導遊同我媽咪都係姓蔡，特別投契，氹到我媽好開心。由我見佢到講拜拜，佢個樣都係極殘，夜晚睇完螢火蟲成十二點，半夜三點又要起身玩熱汽球，而家做guide真係好辛苦。
之後番市中心土產店，然後在酒店食自助餐，由於啲蟹未消化，我只食頭盤同甜品，啲生蠔又係好好食，甜品朱古力波波又食咗好多粒，飽到好滿足！
沒有留言:
張貼留言