日本東京富士山五天團@ DAY 3 2010.11.06 富士急樂園+新宿

十點到咗富士急樂園(背後又見到富士山)，估唔到導遊比三個鐘我哋玩喎，我哋主要玩Thomas land夠晒啦。一到停車場就見到其中一座過山車，呢度啲過山車舉世知名咁恐佈呀，又長又高又斜又耐，唔好話玩經過時個心都震晒，嗰啲叫喊聲好悽勵，比幾多錢我都唔玩，因為冇命番落嚟！

主要都係玩Thomas land.啱稚齡的小朋友，低低哋過咗六歲都唔太啱玩。
仲係11月5日未轉日子。

一去到同晴晴一齊玩呢個Thomas過山車，要每人200yen我叫恩祈自己去玩，點知一定要一個大人陪一個小朋友，400yen居然只係玩得一轉都冇一分鐘又少少刺激都欠奉。

下面架火車眼仔碌碌會轉嚟轉去

恩祈第一次揸車，自己控制方向，100yen一次又有張Thomas card送，抵玩！

第二次就試吓第二款車，佢控制得好好呀，係有時比啲唔識揸車的bb撞啫，佢喺度玩得好開心呢！

世界上最大的招財貓 ↓

兩個大小儍瓜.......

哈姆太郎腳踏車導遊話唔好試，踩到攰到你暈又唔可以中途落車。

好大個溜冰場.....其實富士急地方好大，好多大人刺激遊戲玩，最勁最出名就係三款癡線過山車同世界最長鬼屋啦。

係咪叫鬼太郎呢？

恩祈好入戲，表情好配合。

佢最鍾意超人，話肌肉人好靚仔

呢個場景係模擬玩緊過山車，仲有大風吹啲頭髮本來似十足，但係婆婆話太大風頂唔順要走喎，我叫佢：咪走佬呀！冇人可以玩緊過山車中途落車！唔連戲。

玩完係附近食埋午餐出東京，一見到呢啲餐盒就怕怕，好在仲有啲手打烏冬啫。

日本啲物價冇乜貴，一罐咖啡都係120yen.二十幾年前都100yen啦，但對番港紙就貴咗成倍咯！

到咗新宿都差唔多六點，導遊帶我哋去咗歌舞伎叮食豬骨拉麵，只係500yen碗仲可以加多個麵底，但係我哋冇加都食唔落。佢好搞笑，話平嘢貴嘢都要試，平時帶我哋去搵平嘢，然後就幫襯佢賣啲貴嘢。我真係好佩服佢。

鹹豬手？！

細路女同老人家唔應該咁夜嚟呢種咁雜嘅地方，遊客除外啦。

新宿街頭

三個小時在新宿，shopping嘅人就唔多夠，但係我哋去邊打發時間呢？好在導遊介紹伊勢丹(好耐冇聽同好懷念的百貨公司)九樓猿人童裝部有兩個迷你香蕉池(類似波波池但唔係波係蕉)，恩祈勁happy同個日本妹妹玩咗大半個鐘。

周末晚上新宿成條大街都係熟食檔好熱鬧。行三個鐘都有人遲到，恩祈同晴晴唯有坐係電單車上等啦。