我哋在東京住兩晚的酒店是APA Hotel Tokyo Bay.是東京最高的酒店，打開窗就可望到整個東京灣的壯麗海景，大堂都好大好靚，但想不到房間係超細同早餐係超難食。
位於海濱幕張站，距離東京市中心好遠，好在去廸士尼就好近，幾個站二十分鐘就到。
去到舞濱站已經到Tokyo Disneyland好興奮，不過我哋今次係去DisneySea因此又要轉Disney resort line的列車。
經過童話堡壘一樣的Tokyo Disneyland Hotel.又望到Disneyland人山人海，平日都多人今日星期日仲夠迫，心想好在係去DisneySea因為前者去過十幾次，而Sea未去過加上有恩祈未見過又好鍾意的 Princess Jasmine同Ariel.
雖然Sea望落少人好多但買入場票都排咗半個鐘，差唔多十點至到個門口大地球，我仲plan兩點要離開，都係行吓影吓相冇話想玩乜嘢game咯。
下面個聖誕裝飾公仔冇乜特別，但佢係我哋見的第一條長長的人龍，可以想像其他卡通人物同遊戲的人龍會有幾長幾長...........跟住就見到第二條更長的人龍，心想一定是甚麼好玩game.點知原來係排隊買爆谷，真係癡線！Disneyland嗰邊一定更多更多人，咁鍾意又樂意排隊的日本人，帶住老小真係唔同你哋顛，逛吓relax吓好過。
恩祈的任務係尋找Princess Jasmine.第一張見到有Jasmine的掛畫
我同恩祈講等佢大個一定要玩呢個"驚魂古塔"，勁抽呀！係跳樓機嚟。不過佢而家剩係鍾意玩開門。
上面居然又長龍影相，又要話佢哋癡線啦。下面係位於"發現港"的水上逗趣船，好得意好想玩，不過見到條龍想吓好啦，其實Sea大部份都係刺激game都好少啱老人家同小朋友。
Sea的地方好大好大，行到腳跛至行到去我哋嘅目的地：阿拉伯海岸。阿拉伯打扮嘅史廸仔梗係好多人排隊，反而香港廸士尼我哋未見過的燈神冇人問津喎。
咁恩祈食緊嘢都同佢影相啦，燈神仲拉埋婆婆一齊影呢。
去到有Jasmine的水池恩祈又遞起有Jasmine個樣的唇彩頸鍊影相。
見到有個"仙巴傳奇之旅"的game門口冇乜人排隊，就去玩我哋入嚟的第一個game啦，果然排咗十五分鐘就有得玩。
係好似小小世界坐船仔睇啲會郁的公仔而且有故事嘅，但啲公仔做得好生動，佢兩婆孫話好好睇仲睇成十分鐘(其他game可能排兩個鐘玩得五分鐘)，不過恩祈問我Sindbad的故事我淨係話記得仙巴打海盜其他唔知道咯。
睇完仙巴出嚟居然見到茉莉公主Jasmine.佢又同恩祈傾計同欣賞恩祈心口有自己個樣的頸鍊，恩祈見到偶像幾開心呀！
跟住去神燈劇場睇4D show.係睇仙巴之前先取的fastpass所以唔駛點排隊。
睇4D當然要帶眼鏡，仲有真人穿插其中，都幾精采。
雙層旋轉木馬好靚好想玩，門口話排二十分鐘但我哋排咗一陣唔對勁，好似仲有排排就臨陣退縮，因為仲要趕住去美人魚礁湖探恩祈第二最愛的小魚仙Ariel呀！
沒有留言:
張貼留言