無端端就戒咗奶咀

上次戒片有晒準備，從未想過要同恩祈戒奶咀，因為睡前食奶咀已成為一種儀式，冇奶咀等於冇得瞓，我又不想殘忍地搽嘢落奶咀，我只想用勸教方式等佢自然離咀(好似以前餵母乳般她會自然離乳) 我總覺這是最好的方式，不用強迫開心地成長。

恩祈七個月大起才肯食奶咀，日夜不離，一歲起減少，歲半之後只有睡覺才食，兩歲左右一睡著便甩開，證明已不再太需要用來安撫，只是一種心癮，其實半年前開始我已向佢灌輸："咕咕好臭呀！"唔知點解佢從小就叫奶咀做"咕咕"，結果她每次起身第一件事就係將咕咕吐得好遠，話"好臭呀！"最近見到街上有小bb食奶咀，佢居然行近同bb講："食咕咕，好臭呀，咪食啦！" 哈！終於在2008年7月27日，機會來了......事緣當晚我問恩祈有冇v.v.佢居然拉著褲子話冇呀，然後又打我一巴，我問重打唔打，佢控制唔到自己重打多兩巴......我身為媽咪冇打細路，重比個女打到好痛真係好嬲，我鬧佢：真係想打死你！我當然冇打所以鬧得好毒呀。我嬲到決定今晚唔比奶佢飲，反正想戒夜奶，但佢哭到死去活來就唯有比佢飲解渴，我就同佢講罰妳以後冇咕咕食，其實我個心驚驚地唔知得唔得，佢真係冇要過仲自己上床瞓，半夜發惡夢喊住話要媽咪都冇提過咕咕呀，早上起身佢就細細聲問過，我只輕輕帶過話bb先食妳大個唔食啦，佢就算啦。之後都有喊吓問吓但冇又o.k.重自言自語："唔食咕咕、bb食。"不過代價係要搞好耐至瞓得著，過渡期係難過啲但要堅持呀。見到人哋bb有奶咀佢個樣有啲感嘆只係望吓......恩祈真係長大咗又明白事理啦！我其實真係好鍾意佢食奶咀瞓著個樣，好bb像長不大好趣緻呀，但，人始終要成長，拜拜啦！好臭的咕咕！