廿六個月

恩祈26個月的壯舉有戒奶咀、戒片(未識示意要提醒)、非常樂意開口俾媽咪刷牙(以前係食奶咀瞓著後刷)、識漱口、脾氣好咗不哭鬧，好一個常笑常跳的活躍快樂寶寶！

最近愛睇褔娃卡通，但daddy放工兩個就爭睇電視，一個要睇奧運一個要睇Dora,多數daddy爭贏，佢就可憐兮兮找我訴苦兼告狀話：爸爸曳曳！不過都好，睇少咗好多電視。
每事問："呢個咩嘢？" 口頭禪："乖叻呀！"無論係瞓覺、行行吓街、玩玩吓、甚至見到我嬲，都會講"乖叻呀！"討我歡心，可能佢覺得只要佢乖同叻大人就會開心。
右眼有時都係單眼皮，如果兩隻眼都雙眼皮就靚好多啦，通常係唔夠瞓至會。

愛食乳酪，食到最後都好唔捨得話：仲有啲啲呀！不過有時又乖巧話：咳呀！媽咪食呀！
留意天氣報告，不愛落雨因為冇得玩，最愛好天會歡天喜地話有太陽伯伯，天黑會話太陽伯伯瞓咗覺，又愛抬頭望窗外月亮，話好高同好大。

 

戴到成身首飾自覺好靚

鍾意玩銀包電話，玩完會完整地歸還。仲有玩包、剪、揼，但係個剪係會兩隻手指扭曲嚟剪。又當我係人肉遊樂場，當我雙腿係滑梯sir,又要我用對手凌空"稱"起佢玩飛天韆鞦。愛玩買賣遊戲，會推車仔或擰住啲shopping bag話"有嘢賣"，"有冇人買嘢？"仲會假扮收錢、找錢，執到supermarket啲單又問我幾多錢。
很愛說話，用詞豐富，甚至可講整句句字，可惜話音不正，充滿鄉音(似婆婆？)，只有媽咪明白，大部份說話旁人都聽不清楚需媽咪翻譯。