廿四個月

恩祈2歲啦！體重由出生時的2.87kg到現在有10.5kg.媽咪則由生下她後的60kg到現在只有49.5kg.剛好10.5kg送了給囡囡。到目前為止都仍未破戒食過垃圾食物如汽水、糖果、薯片、薯條、炸雞、香腸等，糖份高的只係試過蛋糕和雪糕，朱古力希望等她識刷乾凈牙至試，因此現在仍未有偏食情況，自歲半起都是自己食大半碗飯，重要係淡味的肉和菜。
情緒比前較穩定，不會制止她發脾氣,不須壓抑讓她發洩完冷靜後，會自動走過來說：乖啦！意思是已平復心情。晚上睡覺除了有特殊情況如發惡夢(會發開口夢)、蚊咬或敏感身痕外，都可以乖乖睡至天亮。去睇過中醫說她體質不屬熱或寒底，同上次在北京同仁堂睇都一樣話無問題，不過同我一樣面有青筋血氣不足，勉強說是偏向少少寒，便執咗一劑"養胃補血"藥方煲，恩祈話苦只肯應酬飲了幾口，結果都係我飲晒呢！
都係成日郁身郁勢，有時重古靈精怪向後行、打橫行、青蛙跳同在床上翻筋斗，除了長時間外出累了要休息一陣外，都不會再坐bb車，現在它的主要功能是去supermarket買餸和買米用。
比前少看一些電視，多數都係陪佢睇卡通dvd或教育電視、新聞、天氣。而廚房不再禁止入內，但有提佢要小心，反而少咗入去，可能任入就冇神祕感。
以Jasmine姐姐為學習模仿對象，做甚麽她都跟，對Jasmine也是好事，因為要做好榜樣嘛！姐姐搬走咗同返咗Singapore都常常倚著鐵閘門叫她的名字呢！反而對同齡孩子冇乜交流，可能冇嘢學啦。