全面戒片成功！

隆重宣佈：二十七個月大的恩祈，全面戒片成功，yeah！
一個多月前先開始戒片，成個月都唔識示意要靠媽咪提醒去potty......真係發夢都估唔到，由8月15日一踏入二十七個月，佢突然識得每次小便都示意，而9月1日開始，又無端端每晚兩點左右，會自動起身話有呀，自此便冇再濕過片。連大便都肯示意自己坐potty搞掂，出遠街又忍得住等去到廁所至解決，大人廁所都o.k.無驚無險無唔開心全靠恩祈自己就戒晒日、夜片啦！ 

都試過兩次賴尿，但係都有原因，有次mami同daddy鬥嘴，恩祈最怕人鬧交，佢行到我面前講："唔鬧交呀！"我講得興起，只拋下一句："唔係鬧交呀大聲講嘢咋！"跟住她受驚下就......一地都係。仲有一次佢發脾氣擲玩具，我罰佢企在房內，後來オ聽到她哭聲中夾有一句：我有呀！(即係要wee wee)我入到房佢由於喊已忍唔住啦......所以以後一聽到佢講:"唔鬧交呀！"我哋全部都會閉嘴，而罰企時又要確定佢已上過廁所，驚佢又賴呀！
佢能夠在短時間內成功控制大小便，我哋都好驚喜。但係望住一堆特價時買入的紙尿褲，我唯有又要擺上網拍賣吐現啦(上次拍賣嘅係貓糧)！