廿七個月

27個月的恩祈身高90cm，體重仍是10.8kg.下排左右兩邊大牙(第二臼齒)長出，共有18隻牙，開始用牙膏First teeth認真刷牙，鍾意刷牙同漱口，因為好味同知道唔刷牙會牙痛痛，啲牙真係比之前用棉花棒刷乾淨好多。戒晒日、夜片，不再用尿片。

語言爆發期：用好多詞彙和句字，身體部位除了簡單的眼耳口鼻外，其他部位都很熟，主要都是由於她經常發問所以記得入腦，好似額頭、眼眉(有次我話眉毛佢say no)、下巴、頸、膊頭、膝頭、背脊等等。中英對照的生字有apple蘋果、banana香蕉、kiwi奇異果、pumpkin南瓜、monkey馬騮、dinosaur恐龍、mouse老鼠、umbrella傘、blue藍色......但係士多啤梨會講成strawberry shortcake ,haha！亦都係佢自己選擇性學的，沒特別教她也強迫不來。之前講過她不愛唸英文字母，但係有次在診所有張poster有三個字母Q,E,X佢居然能正確地讀出，佢睇好多disney的abc song我估佢應該識晒，不過睇佢肯唔肯講，我哋亦無特別考過佢。佢就成日考人"咩嘢呀？"如答錯佢就say no.好識冧人，當mami煮完餸出廳，佢會講 :"yummy!媽咪妳好叻呀！thank you媽媽！"又或者每次有人讚佢乖叻，佢又會話自己"唔乖唔叻，媽咪(至)乖叻！"簡直成為口號，真係好掂嘅世界女！同佢講thank you,又識答:wellcome！唔駛客氣！形容詞亦有好多，例如會想出一連串的形容詞來形容她喜愛的豆腐花：好味、好食、好甜、好凍。又問一啲親人如爸爸、婆婆、舅父、伯伯的中文名並記住，爸爸的電話只記得頭三個字：933可能太長吧！另外有三個月冇見過Jasmine見番都好似完全忘記，猛問姐姐叫咩名？記咗好耐至識講番Jasmine個名.因此証明現階段的孩子只有短期記憶，只要不常練習就會忘記，不必介懐能學多少，只要有興趣當遊戲就得。

發音比上月進步少許，發現佢鍾意"依"起個咀不愛"嘟"長個咀發音，不過太多抖正會令佢欠缺信心所以只好慢慢來，英文發音就好準，例如她總是將士多啤梨講成士多啤"喜"，教佢講正音佢就索性答strawberry來逃避。顏色方面就退步咗，隻隻色都主動話係紅色，又冇人問佢自己亂講，都唔知係咪唔識定玩嘢。不過形狀方面有啲突破，識分圓形(以前總叫做波形)、橢圓形、四方形同長方形，以上四種形狀係通過不同形狀同變形後的番梘學會的。

講完學習再講個人品格方面，變得有禮貌咗，出街也不再瘋癲，以前落街係不規則四方八面的跑和跳，但今個月佢改變咗總是拖住媽咪肯直線行，間中至會拖住兩個大人的手凌空跳(佢話自己係馬騮monkey！)天氣熱會主動幫大人撥扇，又會幫手攞拖鞋同掉垃圾，愛討人歡心，但另方面又學會扮喊，冇眼淚只有口水。
恩祈又影証件相啦，因為要準備報名入幼稚園。又回顧吓同睇吓佢不同階段的成長，左起：十個月、二十一個月同二十七個月。臉型由圓變尖，頭髮由短變長，嘴唇由薄變厚，嘴巴由寬變細咗，眼睛就一樣o甘大。