戒奶樽

 

2008.09.29    今晚同恩祈戒奶樽，用杯好快飲晒，成功咗啦！一早就想戒奶同奶樽，又係嗰句：唔夠勇氣。因為要做就要成功......但係恩祈由細抗拒飲水，依家先飲多少少，明知飲奶(除咗人奶)唔係好嘢(一早就知過多營養將來易致癌)唯有每日比佢飲少少哋total 12oz啦，至於飲奶樽容易蛀牙都想一歲就戒，可惜初時佢用杯飲得又慢又少，最弊係容易濁到咳就放棄咗......直至今日在宜家買咗隻$3.9的玻璃杯就試下咯，平平哋打爛都唔肉痛嘛！其實小朋友最好用玻璃杯飲嘢，有重量有真實感至投入呀，唔明啲小朋友成四、五歲仲用隻輕飄飄膠杯，用熱啲嘅水溶啲致癌物質仲死，啲細路甚至bb都好叻架，好少會打爛玻璃，而且打爛一次仲好下次會小心啲，反而膠杯又輕又唔爛仲搞到小朋友成日掉杯唔愛惜。

恩祈話：我要用杯飲奶奶, I can do it!

講番戒咗奶樽以後唔駛洗又唔再怕奶咀潔要消毒真係舒服晒，下一步就係等恩祈啲奶粉存貨飲晒後(大約11月中佢兩歲半的時候)，就戒埋飲奶，到時就改飲豆漿或者鈣思寶維他奶之類，總之都係貫徹樣樣嘢都食啲來分散風險(佢一路都腸胃好係隻隻奶粉都飲下冇固定)，多謝揭發咗毒奶事件令我更加強決心同個女戒奶呀！