今個月終於突破11kg啦！上排最後兩隻大牙都出埋，共20隻牙，所有乳齒出齊。
中文1-10同英文one to ten終於聽到佢識數晒，不過有時都會忘記skip咗，例如five之後就seven之類。好喜歡聽story telling,晚上愛捉daddy上床讀故事書，學懂好多生活常識同英文字，常常提問，有時我會睇錯啲事物，好似我話電視有隻鹿，佢就立刻抖正話唔係，係羊咩咩，佢識得嘅嘢都會顯得好有信心不易被人誤導，學識啲事物名稱後又會問英文點講，但係有啲我都唔識我只好講唔知。重有識背爸爸電話六個字啦，上個月只記得933, 今個月係933966,實情係93396xx6,仲差兩個數字。
隔離阿瑜姐姐有時都有來我屋企玩
最怕爸爸，想睇卡通總係叫我開俾佢睇，我就叫佢問吓爸爸俾唔俾先，佢就會即刻講："'唔俾，媽咪俾！"可能我太自由令佢以為我很縱佢，有時我有番啲堅持佢就會郁手打我(剩係會對我o甘)，雖然已減少但都係不可容忍，就罰佢企係房門口，佢知錯真係會乖乖罰企不動，最多企响度喊都唔敢行開，之後我就行過去錫錫咀安慰她及講她所做錯的事，佢就會say sorry！以前佢對婆婆都係比較差，但係依家婆婆做咗惡人身份，恩祈明顯怕咗佢，重同婆婆改咗個英文名：tiger !如果恩祈曳的話婆婆就變咗隻老虎會咬人呢！
會理解事物的產生：有次她在廚房睇我剝皮蛋，我話佢知剝咗殼就會見到隻黑蚊蚊嘅蛋，佢居然話有雞仔bb出嚟，我都唔知佢係邊學到知道雞蛋內有雞仔的常識。婆婆又講過一次我哋一家四口所屬生肖，佢隔咗好耐之後重可以清楚答番我每個人屬乜嘢，依家佢真係好似一塊海綿強力地吸收知識。
沒有留言:
張貼留言