四歲半

恩祈四歲半了，身高104cm.體重15.2kg

佢而家學嘅除咗Montessori jelic class(每次會做到兩個Jelic box有時做到三個)外，興趣班有芭蕾舞、跆拳道、同聖公會的畫班，另外排緊隊學鋼琴，因此遲啲想skip一樣比啲時間學piano.點知佢話最鍾意係跆拳道.......芭蕾舞同畫畫，即係全部都係最鍾意冇講過嘢，再追問最最最鍾意，佢答係畫畫。
第一堂畫班的作品，雖然好簡單但係佢親手畫我覺得好靚呀。(有啲學費好貴的畫班嘅畫太靚太工整連父母都話打死唔信係自己個女畫)

下面係課室外貼的畫作，佢當然寫譚子清係佢的最好朋友。而感意外的是除咗子清外仲有幾個同學都寫恩祈係佢哋的好朋友，証明她的人緣唔錯好安慰。

恩祈閒時自己動手做的泥膠作品，全部自創冇人插手。

最愛都係畫畫。仲有玩電腦(學校比學生在家玩的學習平台)的互動遊戲都已完全掌握，全都明白同可以獨自玩，即係開始同我爭電腦用。

想不到佢做功課又快又好，有時見三份功課又要做兩次(補做旅行放假嗰啲)，叫佢做住一份先，等我洗完碗番嚟佢已全部做晒(佢做功課時唔比人睇住做完先比睇)。而且我覺得最難寫的中文佢反而係寫得最好，而家幾乎係一次寫晒唔洗擦重寫，佢上課時好用心聽老師教因此筆劃都o.k.我冇理過佢功課。

英文未學寫細楷佢鍾意就自學，係叫佢做又唔會做嗰隻，所以屋企要常備有趣的練習簿在周圍，佢一想寫就有得寫.......不過佢教極都唔曉正確揸筆姿勢，同我一樣。

daddy在二手市場買咗呢間九成新正版Barbie睡房比佢後就日日玩成為至愛玩具(之前係影曦屋企玩過類似的好鍾意但Toy'r'us賣成三百蚊今次呢間$10蚊咋!)仲會作故仔。

(2010.11.16)