兩歲半的恩祈有12kg重，手抱都覺重咗好多，唔似以前輕飄飄，之前半年無乜重過，最近兩個月就重咗兩磅幾，增肥初步成功。由於飲水量仍少，只好早晚改用營養較低的4號奶粉(3歲用)再沖淡的奶比佢飲，希望只吸收多啲水份而減少奶量。
明白"你"同"我"的分別同運用，例如以前同佢講"你XX"佢就只會跟住講"你XX"or"恩祈XX"但而家識轉化為"我XX"，而顏色亦終於識分，仲會指住顏色細分為粉紅色、粉藍色之類，數字暫時學到1-30(中英文口讀)亦教緊數數目(唔易)，字就唔知識唔識睇。過馬路識睇紅綠燈，每次都會大聲話："綠色過得，紅色唔過得！"識畫直線同圓圈，當然唔太直同太圓，但叫佢劃會到劃出來。
上面幅畫恩祈本來只畫圓圈，跟住我叫佢畫媽媽，首先叫佢畫兩隻眼，佢真係畫到兩隻，再叫佢畫個嘴，佢又係對下位置畫咗個圓圓地嘅嘴，佢真係自己畫我只係口講冇掂過佢隻手，不過我唔記得叫佢畫個鼻。下面都係佢自由創作，又係有兩隻眼。
佢而家都識玩拼字咭，不過係我講中文再講一次英文佢再將字咭放在對應圖畫，因為佢未識睇字。
而家講到好長句字，有啲吃力(要思考一陣)但都好流利，最常講的有："媽咪話食完奶奶要刷牙架！"同"媽咪話玩完啲玩具要執番好架！"仲有"爸爸你唔駛理我你瞓覺啦！"講說話好識氹人，好似話"媽咪靚女爸爸靚仔婆婆靚婆恩祈靚B"一家都靚晒笑死人。
自己砌Lego砌到好高或好長，好獨立創作兼好有成功感。
佢又好有公德心，好多時話去廁所又無v.v.但有一陣臭味，原來佢可以忍住去廁所至放屁。
12月11日大日子，一路只愛跳舞從不肯唱歌的恩祈，第一次聽到佢唱"Twinkle twinkle little star,how I wonder what you are"雖然只有兩句，係一大突破呀！
最近突然變得好貪靚，見到媽咪搽唇膏就話好靚呀，好在未有話要搽......另外又中咗公主毒，成日話自己係阿Belle,爸爸係野獸。又攞細個時張包被當斗蓬著，著埋粉紅色高踭鞋行嚟行去話自己變咗Aurora睡公主好靚喎！
Becky姨姨又送咗張bb床仔比恩祈，不過唔係比佢瞓係比Lilou瞓，但係恩祈有時都坐落去，又比佢坐得落喎！Lilou瞓床仔個樣好sweet~~
沒有留言:
張貼留言